टीम इंडियाचा वेगवान गोलंदाज उडवणार लग्नाचा बार, गर्लफ्रेंडनेच रिंग दाखवत जाहीर करुन टाकलं

भारतीय क्रिकेटपटू अर्शदीप सिंहने अभिनेत्री आणि मॉडेल समरीन कौरसोबत साखरपुडा केला आहे. 11 नोव्हेंबर 2026 रोजी दोघांनी सोशल मीडियावर ही आनंदाची बातमी शेअर केली. अर्शदीपने गुडघ्यावर बसून समरीनला प्रपोज केल्याचे फोटोही समोर आले आहेत. गर्लफ्रेंडने फोटो शेअर करत ही आनंदाची बातमी पुढे आणली आहे. काय आहे पोस्टमध्ये जाणून घेऊ.

भारताचा वेगवान पेसर अर्शदीप सिंग याने साखरपुडा उरकला आहे. त्याची प्रेयसी समरीन कौर हिने सोशल मीडियावर चाहत्यांसोबत ही बातमी शेअर केली आहे. कालच अर्शदीप आयपीएल ट्रेड डीलमध्ये पंजाब किंग्समधून निघून मुंबई इंडियन्सच्या ताफ्यात सामील झाला आहे. त्यानंतर आता दुसऱ्या दिवशीच त्याच्यासाठी ही दुसरी आनंदाची बातमी समोर आली आहे. त्याची प्रेयसी समरीन हिच्यासोबत साखरपुडा पार पडल्याने चाहत्यांकडूनही दोघांवरही अभिनंदनाचा वर्षाव होत आहे.

अर्शदीपची गर्लफ्रेंड समरीन हिने इंस्टाग्रामवर अनेक फोटो पोस्ट केले आहेत. त्यापैकी एका फोटोमध्ये अर्शदीप तिला रिंग देऊन लग्नासाठी प्रपोज करताना दिसत आहे. या पोस्टमध्ये दोघेही खूप आनंदी दिसत आहेत. यावेळी समरिनने अनेक फोटो पोस्ट करत समरीनने खास कॅप्शनही दिलं आहे, “आयुष्यात आपल्याला अनेक गोष्टी मिळू शकल्या असत्या, पण त्या सगळ्यांपेक्षा तू मला मिळालास, याचा मला सर्वात जास्त आनंद आहे. आता आयुष्यभर आपण एकमेकांसोबत राहायचं आहे.” असं लिहित पुढे तिने “आपल्या दोघांच्या आयुष्यभराच्या सोबतीसाठी” असे शब्दही लिहून त्यासमोर हर्टचा इमोजी जोडला आहे.

समरीनने त्याखाली ११ नोव्हेंबर, २०२६ ही तारीख लिहिली आहे. यासोबतच तिने ‘हाय फियांसी’ असेही लिहिले आहे, त्यामुळे अर्शदीप आणि समरीनचा साखरपुडा झाल्याचे निश्चित झाले आहे. त्यांच्यावर क्रिडा विश्वातून अभिनंदनाचा वर्षाव होत आहे.

View this post on Instagram

A post shared by Samreen (@samreenkaur__)

अर्शदीप आणि समरीन एकमेकांना डेट करत होते

दरम्यान, गेल्या काही महिन्यांपूर्वीच समरीनच्या वाढदिवसानिमित्त अर्शदीपने तिला रोमँटिक पद्धतीने शुभेच्छा दिल्या होत्या आणि त्यांच्या नात्याला उघडपणे दुजोरा दिला होता. त्यानंतर अर्शदीप आणि समरीन अनेकदा एकत्र दिसले होते. आता, त्या दोघांनी आपले आयुष्य एकत्र घालवण्याचा निर्णय घेतला असून त्यांचा साखरपुडा झाला आहे.