BCCI New Rule: आता कोणाचीच सुट्टी नाही, बीसीसीआय अॅक्शन मोडमध्ये, आता थेट खेळाडूवर बंदी घालणार
बीसीसीआय एक नवीन नियम आणणार आहे, या नियमाअंतर्गत जर कोणता खेळाडू दोषी आढळला तर त्याच्यावर कारवाई होण्याची शक्यता आहे. तर आता हा नवीन नियम काय आहे यासंदर्भात जाणून घ्या...
क्रिकेटमध्ये, वयाची फसवणूक ही एक सामान्य घटना आहे. अनेक प्रमुख भारतीय क्रिकेटपटू वयाच्या फसवणुकीत अडकले आहेत, ज्यात रसिक सलाम, प्रिन्स यादव, मनजोत कालरा आणि नितीश राणा यांसारख्या खेळाडूंवर बंदी घालण्यात आली आहे. भारतीय क्रिकेटमधील वयाच्या फसवणुकीला आळा घालण्यासाठी बीसीसीआयने आता एक मोठे पाऊल उचलले आहे. वृत्तानुसार, खेळाडूंच्या वयाशी संबंधित कागदपत्रांची पडताळणी करण्यासाठी बीसीसीआयने एका स्वतंत्र एजन्सीसोबत करार केला आहे. आता बीसीसीआय अशा खेळाडूंवर मोठी कारवाई करणार आहे. वय कमी करुन खेळणं हे अनेक खेळाडूंना भारी पडलं आहे.
क्रिकब्लॉगरच्या वृत्तानुसार, बीसीसीआय एक असा नियम आणणार आहे, जी पारदर्शकता वाढवेल आणि खेळाडूंना त्यांच्या वयाबद्दल फसवणूक करण्यापासून रोखेल. बीसीसीआयने ज्या एजन्सीसोबत करार केला आहे, ती एजन्सी वयाच्या पडताळणीसाठी शाळा आणि इतर संस्थांशी संपर्क साधल्यानंतरच खेळाडूंच्या जन्मतारखेची पडताळणी करेल. यामध्ये आधार कार्ड, जन्म प्रमाणपत्र आणि शालेय नोंदींच्या पडताळणीचाही समावेश असेल. ही बीसीसीआय एजन्सी कागदपत्रांना प्रमाणित करण्यासाठी ऑनलाइन पडताळणी देखील करेल.
जर वृत्तांवर विश्वास ठेवायचा झाल्यास, वयाच्या फसवणुकीत दोषी आढळलेल्या कोणत्याही खेळाडूवर बंदी घातली जाईल. तो कोणत्याही वयोगट क्रिकेटमध्ये किंवा राज्य संघाकडून खेळू शकणार नाही. खेळाडूवर कारवाई करण्यापूर्वी बीसीसीआय कारणे दाखवा नोटीस बजावेल. खेळाडूला त्याची बाजू मांडण्यासाठी पुरेशी संधी दिली जाईल. जर तो आपली बाजू सिद्ध करण्यात अयशस्वी ठरला, तर कठोर कारवाई निश्चित आहे. बीसीसीआय आपल्या खेळाडूंना बायोमेट्रिक पडताळणी करण्याचे निर्देशही देत आहे. आगामी हंगामात संघ किंवा राज्य बदलणाऱ्या खेळाडूंना 1 सप्टेंबरपर्यंत ही माहिती द्यावी लागेल.
वयाच्या फसवणुकीला आळा घातल्यास प्रतिभावान खेळाडूंना सर्वाधिक फायदा होईल. अनेकदा, वयस्कर खेळाडू आपले वय कमी लेखतात आणि त्यामुळे खेळाडूंना योग्य वयाची माहिती मिळत नाही. माजी कर्णधार आणि माजी मुख्य प्रशिक्षक राहुल द्रविड यांनी हा मुद्दा उपस्थित केला आहे. राहुल द्रविड यांच्या शिफारशीनंतरच 19 वर्षांखालील विश्वचषकात केवळ एकच संधी देण्याचा नियम लागू करण्यात आला. जर खेळाडूचे वय अचूक असेल, तर त्यांना त्यांची तंदुरुस्ती सुधारण्यास मदत होईल.
