बांगलादेशचा ऐतिहासिक विजय! ऑस्ट्रेलियाला कसोटीत त्यांच्याच भूमीत लोळवलं, मालिकाही हातून गेली

बांगलादेशच्या कसोटी क्रिकेटच्या इतिहासात मोठा विजय मिळवला आहे. बांगलादेशने ऑस्ट्रेलियाला त्यांच्याच भूमीत जाऊन लोळवलं आहे. ऑस्ट्रेलियाने विजयासाठी अवघ्या 56 धावांचं आव्हान दिलं होतं. हे आव्हान बांगलादेशने 1 गडी गमवून सहज पूर्ण केलं आणि ऐतिहासिक नोंद केली. या सामन्यात पूर्णपणे बांग्लादेश संघाची पकड दिसून आली. कांगारूंना कुठेच डोकं वर काढू दिलं नाही. पहिल्या डावापासून बांगलादेशी संघ वरचढ राहिला. त्याचा परिणाम या सामन्यात विजयाने झाला. बांगलादेशने दोन सामन्यांच्या मालिकेत 1-0 ने आघाडी घेतली आहे. त्यामुळे आता ही मालिका ऑस्ट्रेलियाच्या हातून गेली आहे. आता मालिका वाचवण्यासाठी ऑस्ट्रेलियाला धडपड करावी लागणार आहे. कारण दुसरा सामना जिंकला तर मालिका बरोबरीत सुटेल. अन्यथा मालिका पराभवाचं सावट असणार आहे.

सामन्यात काय काय घडलं?

ऑस्ट्रेलियाने नाणेफेक जिंकली आणि मनासारखा निर्णय घेतला. प्रथम फलंदाजी करून बांगलादेशला आरामात पराभूत करू असं वाटलं होतं. पण तसं काही घडलं नाही. उलट हा निर्णय ऑस्ट्रेलियाच्या अंगलट आला. ऑस्ट्रेलियाचा संपूर्ण संघ 198 धावांवर बाद झाला. त्यानंतर बांगलादेशने झुंजार खेळी करत 426 धावा केल्या. त्यामुळे पहिल्या डावात 228 धावांची मजबूत आघाडी मिळाली. ही आघाडी मोडून काढताना ऑस्ट्रेलियाच्या नाकी दम आला. ऑस्ट्रेलियाचा संपूर्ण संघ दुसऱ्या डावात कसा बसा 284 धावांवर पोहोचला. त्यामुळे बांगलादेशला 56 धावांचं सोपं आव्हान मिळालं. हे आव्हान बांगलादेशने सहज गाठलं. बांगलादेशचा ऑस्ट्रेलियातील हा पहिलाच कसोटी विजय आहे. त्यामुळे त्याची इतिहासात नोंद झाली आहे.

बांगलादेशच्या विजयाचे हिरो कोण?

बांगलादेशच्या विजयाचा मुख्य हिरो ठरला तो हसन महमुद.. त्याने पहिल्या डावात ऑस्ट्रेलियाची दाणादाण उडवून दिली. त्याने 6 विकेट घेतल्या आणि ऑस्ट्रेलियाला 198 धावांवर रोखलं. त्यानंतर पहिल्या डावात बांगलादेशकडून तन्झिद हसन तमीमचं शतक, नजमुल होसेने शांतोच्या 84 धावा आणि मेहिदी हसनच्या 65 धावांमुळे बांगलादेशी संघ मजबूत स्थितीत आला. दुसऱ्या डावात मेहिदी हसन मिराजने दाणादाण उडवून दिली. पाच विकेट घेऊन ऑस्ट्रेलियाला बॅकफूटवर ढकललं. तर हसन महमुद पुन्हा एकदा दुसऱ्या डावात चमकला आणि 3 विकेट काढल्या.