ENGW vs SAW Semi Final Toss : दक्षिण आफ्रिकेचा बॉलिंगचा निर्णय, इंग्लंडला किती धावांवर रोखणार?
England vs South Africa Women 2nd Semi Final Toss and Playing 11 : यजमान इंग्लंडने उपांत्य फेरीतील सामन्यात पाहुण्या दक्षिण आफ्रिकेविरुद्ध बॅटिंग करणार आहे. इंग्लंड दक्षिण आफ्रिकेसमोर किती धावांपर्यंत पोहचते याकडे चाहत्यांचं लक्ष असणार आहे.
आयसीसी वुमन्स टी 20i वर्ल्ड कप 2026 स्पर्धेतील उपांत्य फेरीतील दुसऱ्या सामन्यात इंग्लंड विरुद्ध दक्षिण आफ्रिका आमनेसामने आहेत. हा सामना लंडनमधील केनिंग्टन ओव्हलमध्ये खेळवण्यात येणार आहे. नॅट सायव्हर-ब्रंट इंग्लंडचं नेतृत्व करणार आहे. तर लॉरा वॉल्डवॉर्ड्ट हीच्याकडे दक्षिण आफ्रिकेच्या कर्णधारपदाची जबाबदारी आहे. उभयसंघातील सामन्याला भारतीय वेळेनुसार रात्री 11 वाजता सुरुवात होणार आहे. त्याआधी 10 वाजून 30 मिनिटांनी टॉस झाला. दक्षिण आफ्रिकेने टॉस जिंकून इंग्लंडला बॅटिंगसाठी भाग पाडलं आहे. त्यामुळे आता इंग्लंड किती धावा करण्यात यशस्वी ठरणार? याकडे चाहत्यांचं लक्ष असणार आहे.
वुमन्स टी 20i वर्ल्ड कप स्पर्धेत दोन्ही संघांची आमनेसामने येण्याची ही सातवी वेळ आहे. इंग्लंडने 6 पैकी सर्वाधिक 4 सामने जिंकले आहेत. तर दक्षिण आफ्रिकेने 2 सामने जिंकलेत. आता सातव्या सामन्यात कोण यशस्वी ठरणार? याची चाहत्यांना प्रतिक्षा असणार आहे.
इंग्लंड ओव्हलमध्ये अजिंक्य
इंग्लंडचं ओव्हलमध्ये एकतर्फी वर्चस्व राहिलं आहे. इंग्लंडने या मैदानात खेळलेले पाचही सामने जिंकले आहेत. त्यामुळे इंग्लंड या मैदानात सलग सहावा सामना जिंकत अंतिम फेरीत पोहचणार की दक्षिण आफ्रिका मैदान मारणार? यासाठी निकालाची प्रतिक्षा करावी लागणार आहे.
इंग्लंडचा विजयी पंच, दक्षिण आफ्रिकेचा चौकार
दरम्यान इंग्लंडने साखळी फेरीत जबरदस्त कामगिरी केली. इंग्लंडने साखळीतील पाचही सामने जिंकले. इंग्लंड साखळी फेरीनंतर पॉइंट्स टेबलमध्ये पहिल्या स्थानी राहिली. तर दक्षिण आफ्रिकेने 5 पैकी 4 सामने जिंकले. त्यामुळे आता इंग्लंड सलग सहावा सामना जिंकून वर्ल्ड कप ट्रॉफीवर एक हात ठेवणार की दक्षिण आफ्रिका मैदान मारणार? हे थोड्याच वेळात स्पष्ट होईल.
इंग्लंड वुमन्स प्लेइंग ईलेव्हन : एमी जोन्स (विकेटकीपर), डॅनी व्याट-हॉज, नॅट सायव्हर-ब्रंट (कर्णधार), ॲलिस कॅप्सी, हेदर नाइट, फ्रेया केम्प, डॅनियल गिब्सन, शार्लोट डीन, सोफी एक्लेस्टोन, लिन्से स्मिथ आणि लॉरेन बेल.
दक्षिण आफ्रिका वुमन्स प्लेइंग ईलेव्हन : लॉरा वॉल्डवॉर्ड्ट (कर्णधार), तझमिन ब्रिट्स, ॲनेरी डर्कसेन, स्युने लुस, मारिझान कॅप, नादिन डी क्लर्क, क्लो ट्रायॉन, सिनालो जाफ्ता (विकेटकीपर), शबनीम इस्माईल, अयाबोंगा खाका आणि नॉनकुलुलेको म्लाबा.
