IND A vs SL A: भारत श्रीलंका यांच्यात दुसरी औपचारिक कसोटी, पहिल्या दिवशी असं घडलं

भारत ‘अ’ आणि श्रीलंका ‘अ’ यांच्यातील दुसरा औपचारिक कसोटी सामना गॉल येथे सुरू आहे. या सामन्यात नाणेफेकीचा कौल भारताच्या बाजूने लागला. कर्णधार ध्रुव जुरेलने प्रथम गोलंदाजी करण्याचा निर्णय घेतला. श्रीलंकेने प्रथम फलंदाजी करताना 5 गडी गमवून 288 धावा केल्या. श्रीलंकेचा कर्णधार सहान अराचीने नाबाद 83 धावांची खेळी केली. भारताकडून सारांश जैन आणि यश ठाकूर यांनी प्रत्येकी 2 बळी घेतले, तर गुरनूर ब्रारने एक बळी घेतला. श्रीलंका ‘अ’ संघाने चांगली सुरुवात केली. पहिल्या विकेटसाठी 53 धावांची भागीदारी केली. सोहन डी लिवेरा 28 धावांची खेळी करून बाद झाला. यश ठाकुरच्या गोलंदाजीवर देवदत्त पडिक्कलने झेल पकडला. त्यानंतर पवनथा वीरसिंघे 39 धावांवर असताना गुरनूर ब्रारने त्याला तंबूत धाडलं.

तिसऱ्या क्रमांकावर फलंदाजीला आलेल्या नुवानिंदू फर्नांडोने सारांश जैनच्या गोलंदाजीवर बाद होण्यापूर्वी 44 धावा केल्या. तीन विकेट पडल्यानंतर अशेन बंदारा आणि सहान अराचीने चौथ्या विकेटसाठी99 धावांची भागीदारी केली. अशेन बंदारा 34 धावा करून यश ठाकुरच्या गोलंदाजीवर तंबूत परतला. दिवसअखेरीस, अराचीने नाबाद 83 धावा आणि गुणसेकराने 6 धावांवर खेळत आहेत.

पहिल्या कसोटीत उत्कृष्ट गोलंदाजी करणाऱ्या अकीब नबी दारला दुसऱ्या कसोटीच्या पहिल्या दिवशी एकही बळी घेता आला नाही. नबीने चार निर्धाव षटकांसह 15 षटके टाकली आणि पहिल्या दिवशी 50 धावा दिल्या. सारांश जैनने 24 षटकांत 77 धावा देऊन दोन बळी घेतले, तर झीशान अन्सारीला 16 षटकांत 64 धावा देऊन एकही बळी घेता आला नाही. शेख रशीदने एक षटक टाकले आणि 10 धावा दिल्या.

दोन्ही संघांची प्लेइंग 11

श्रीलंका अ (प्लेइंग इलेव्हन): पवनथा वीरसिंघे, सोहन डी लिवेरा, नुवानिडू फर्नांडो, अशेन बंदारा, सहान अरचिगे (कर्णधार), अंजला बंडारा (विकेटकीपर), चमिका गुणसेकरा, दिलम सुदेरा, केशरा नुवांथा, दुलाज समुदिथा, असांका मनोज.

भारत अ (प्लेइंग इलेव्हन): साई सुदर्शन, अमन मोखाडे, देवदत्त पडिक्कल, रुतुराज गायकवाड, ध्रुव जुरेल (कर्णधार/विकेटकीपर), शेख रशीद, सरांश जैन, झीशान अन्सारी, औकीब नबी दार, यश ठाकूर, गुरनूर ब्रार