IND VS ZIM : एक-दोन नव्हे तर 5 सलामीवीरांसह टीम इंडिया मजबूत, आज झिम्बाब्वेविरुद्ध कोणाला मिळणार संधी? वाचा…

नवी दिल्ली : आजपासून झिम्बाब्वे विरुद्ध सुरु होणाऱ्या तीन सामन्यांच्या वनडे मालिकेपूर्वी (IND vs ZIM 1st ODI) सर्वांचे लक्ष भारतीय कर्णधार केएल राहुलच्या (KL Rahul) फॉर्म आणि फिटनेसवर असेल. टीम इंडिया (Team India) या दौऱ्यावर 5 स्पेशालिस्ट सलामीवीरांसह दाखल झाली आहे. कर्णधार केएल राहुलशिवाय फलंदाज शिखर धवन, ऋतुराज गायकवाड, इशान किशन आणि शुभमन गिल हे देखील संघाचा भाग आहेत, परंतु प्लेइंग इलेव्हनमध्ये कोणाला स्थान मिळते हे पाहणे बाकी आहे. T20 फॉरमॅटमध्ये भारताच्या टॉप ऑर्डरचा अविभाज्य भाग मानला जाणारा राहुल या मालिकेत आपली ओळखीची लय पुन्हा मिळवण्याचा प्रयत्न करेल. हर्नियाच्या ऑपरेशनमुळे राहुल दोन महिन्यांनी संघात परतला. टी-20 संघातील सलामीवीराची भूमिका कायम ठेवण्याचे आणि पहिल्या चेंडूवर आक्रमक फलंदाजी करण्याचे आव्हान त्याच्यासमोर असेल. प्रशिक्षक राहुल द्रविड आणि नियमित कर्णधार रोहित शर्मा यांची केवळ राहुलच्या धावांवर नजर राहणार नाही, तर धावा कशा होतात हेही पाहायचे आहे.

आशिया चषकापूर्वी टेस्ट

भारतीय संघाला आशिया चषकात 28 ऑगस्ट रोजी पाकिस्तानविरुद्ध पहिला सामना खेळायचा आहे. हरारे स्पोर्ट्स क्लबमध्ये नुकतेच झिम्बाब्वेने बांगलादेशसमोर 300 आणि 290 धावांचे लक्ष्य ठेवले. अशा स्थितीत राहुल, शिखर धवन, शुभमन गिल, दीपक हुडा आणि संजू सॅमसन मोठी खेळी खेळण्याचा प्रयत्न करतील. भारताकडे मोहम्मद सिराज, प्रसिद्ध कृष्णा, दीपक चहर आणि कुलदीप यादवसारखे गोलंदाज आहेत तर शार्दुल ठाकूर आणि अक्षर पटेलसारखे अष्टपैलू खेळाडू आहेत.

झिम्बाब्वेचा उत्साह उंचावला

दुसरीकडे बांगलादेशचा पराभव केल्यानंतर झिम्बाब्वे भारतासारख्या बलाढ्य संघाला आव्हान देण्याचा प्रयत्न करेल. यजमानांना सिकंदर रझा, रेगिस चकाबवा आणि इनोसंट केया यांच्याकडून चांगल्या फलंदाजीची अपेक्षा असेल. एक काळ असा होता जेव्हा झिम्बाब्वेकडे फ्लॉवर बंधू (ग्रँट आणि अँडी), हिथ स्ट्रीक, नील जॉन्सन, मरे गुडविन्स आणि हेन्री ओलोंगासारखे खेळाडू होते. गेल्या दोन दशकांत देशाप्रमाणेच झिम्बाब्वे क्रिकेटचीही अवस्था बिकट झाली असून त्याचा परिणाम संघाच्या कामगिरीवर झाला आहे.

प्रतिभावान खेळाडू

भारतीय संघाचा झिम्बाब्वे दौरा हा सहसा यजमान मंडळाची आर्थिक स्थिती सुधारण्याचा भारताचा प्रयत्न मानला जातो. या तिन्ही सामन्यांचे टीव्ही आणि डिजिटल अधिकार झिम्बाब्वे क्रिकेटला भरपूर कमावतील. क्रिकेटच्या बाजूने निवडकर्त्यांना 2023 मध्ये 50 षटकांचा विश्वचषक खेळू शकणार्‍या बेंच स्ट्रेंथची चाचणी घेण्याची संधी मिळेल. भारताकडे या क्षणी इतके प्रतिभावान खेळाडू आहेत की भारत तिन्ही फॉरमॅटमध्ये तीन वेगवेगळ्या संघांना मैदानात उतरवू शकतो. सहा महिन्यांनंतर संघात पुनरागमन करणारा दीपक चहर आणि हळूहळू वेग पकडणाऱ्या कुलदीपवर निवडकर्त्यांच्या नजरा असतील. आयपीएलमध्ये चांगली कामगिरी करणाऱ्या राहुल त्रिपाठीलाही भारतीय संघाकडून खेळताना त्या गतीची पुनरावृत्ती करण्याची संधी आहे.

भारत संघ : केएल राहुल (कर्णधार), शिखर धवन, रुतुराज गायकवाड, शुभमन गिल, दीपक हुडा, राहुल त्रिपाठी, इशान किशन, संजू सॅमसन, शार्दुल ठाकूर, कुलदीप यादव, अक्षर पटेल, आवेश खान, प्रणंद कृष्णा, मोहम्मद सिराज, दीपक चहर, शाहबाज अहमद .

झिम्बाब्वे संघ : रेगिस चकाबवा (क), रायन बुर्ले, तनाका चिवांगा, ब्रॅडली इव्हान्स, ल्यूक जोंगवे, इनोसंट केया, टी कैटानो, क्लाइव्ह मदांडे, वेस्ली एम, टी मारुमनी, जान मसारा, टोनी मुन्योंगा, रिचर्ड अंगारावा, व्हिक्टर एन, सिकंदर रझा, मिल्टन शुम्बा, डोनाल्ड टिरिपानो