Mohammed Shami Retirement: टीम इंडियाला मोठा धक्का! मोहम्मद शमीकडून निवृत्ती जाहीर; इन्स्टाग्रामवर शेअर केला भावनिक व्हिडिओ, काय लिहिलं?
Mohammed Shami Retirement: भारतीय वेगवान गोलंदाज मोहम्मद शमीने कसोटी क्रिकेटमधून निवृत्ती जाहीर केली आहे. एका व्हिडिओ संदेशात आपला निर्णय जाहीर केला.
भारताचा स्टार वेगवान गोलंदाज मोहम्मद शमीने कसोटी क्रिकेटमधून निवृत्ती जाहीर केली आहे. त्याने इन्स्टाग्रामवर एक व्हिडिओ शेअर करून आपल्या निवृत्तीची घोषणा केली. कसोटी क्रिकेटमधून निवृत्तीची घोषणा करताना मोहम्मद शमीने इन्स्टाग्रामवर लिहिले की, तो कसोटी क्रिकेटमधून निवृत्त होत आहे. परंतु त्यासंबंधित आठवणी त्याच्यासोबत नेहमीच राहतील. शमीने शेअर केलेल्या व्हिडिओमध्ये त्याच्या कसोटी कारकिर्दीच्या सुरुवातीपासून ते त्याच्या प्रमुख कामगिरीपर्यंतचे फोटो समाविष्ट आहेत.
आपल्या कसोटी कारकिर्दीतील आठवणींचा व्हिडिओ शेअर करताना शमीने लिहिले, मी पांढऱ्या जर्सीला निरोप देत आहे, पण तिच्याशी निगडित आठवणींना कधीही नाही. जेव्हा मी पहिल्यांदा भारतीय कसोटी जर्सी घातली, तेव्हा माझे एकच स्वप्न होते: माझ्या देशासाठी काहीतरी करणे… त्यानंतर, प्रत्येक विकेट, प्रत्येक संघर्ष, प्रत्येक दुखापत आणि प्रत्येक पुनरागमनाने मला काहीतरी शिकवले. कसोटी क्रिकेट माझ्यासाठी केवळ एक प्रकार नाही, तर तो माझ्या आयुष्याचा एक खूप खास भाग राहिला आहे. आज, जड अंतःकरणाने आणि असंख्य सुंदर आठवणींसह, मी कसोटी क्रिकेटमधून निवृत्त होण्याचा निर्णय घेत आहे.
शमीने आपल्या सहकाऱ्यांप्रति कृतज्ञता व्यक्त करताना लिहिले, “या प्रवासात मला पाठिंबा देणाऱ्या आणि चांगल्या-वाईट काळात माझ्यावर विश्वास ठेवणाऱ्या प्रत्येक सहकाऱ्याचे, प्रशिक्षकाचे, कुटुंबीयांचे आणि लाखो भारतीयांचे मनःपूर्वक आभार. तसेच बीसीसीआय आणि क्रिकेट असोसिएशन ऑफ बंगाल यांचेही मनःपूर्वक आभार, ज्यांनी माझ्या प्रतिभेवर विश्वास ठेवला, मला प्रगती करण्याची संधी दिली आणि माझ्या क्रिकेट प्रवासात महत्त्वाची भूमिका बजावली. तुमचा पाठिंबा आणि विश्वास माझ्यासाठी नेहमीच खास राहील. माझा शेवटचा कसोटी चेंडू कदाचित टाकला गेला असेल, पण भारतासाठी खेळण्याचा अभिमान माझ्या हृदयात कायम जिवंत राहील. धन्यवाद, कसोटी क्रिकेट.”
मोहम्मद शमीने भारतासाठी आपला पहिला कसोटी सामना 6 नोव्हेंबर 2013 रोजी वेस्ट इंडिजविरुद्ध खेळला. त्याचा शेवटचा कसोटी सामना 7 जून 2023 रोजी ऑस्ट्रेलियाविरुद्ध होता. त्यानंतर त्याला भारतीय संघातून वगळण्यात आले आणि तो अद्याप संघात परतलेला नाही. शमीने कसोटी क्रिकेटमधून निवृत्ती घेतली असली तरी, तो एकदिवसीय आणि टी-20 संघात पुनरागमनाच्या प्रतीक्षेत आहे. शमीने दक्षिण आफ्रिका दौऱ्यादरम्यान कसोटी क्रिकेटमध्ये आपल्या गोलंदाजीचे कौशल्य दाखवले आणि इंग्लंडमध्ये फलंदाजीनेही उत्कृष्ट कामगिरी केली.
