RCB vs LSG: विराट कोहलीचं अर्धशतक आणि विक्रम दोन्ही हुकलं, पण ऑरेंज कॅप मिळवली

आयपीएल 2026 स्पर्धेत रॉयल चॅलेंजर्स बंगळुरूची कामगिरी जबरदस्त झाली आहे. आतापर्यंत खेळलेल्या सामन्यात फक्त एकच सामना गमावला आहे. त्यामुळे गुणतालिकेत आरसीबीचा संघ मजबूत स्थितीत आहे. पाचव्या सामन्या आरसीबीचा सामना लखनौ सुपर जायंट्सशी झाला. या सामनयात आरसीबीने लखनौ सुपर जायंट्सला 146 धावांवर रोखलं. त्यामुळे या धावांचा पाठलाग करणं सोपं असल्याच स्पष्ट झालं. पण फिलीप सॉल्टच्या रूपाने पहिला धक्का बसला. फिलीप सॉल्ट 8 चेंडूत 7 धावा करून बाद झाला. त्यानंतर देवदत्त पडिक्कलही 10 धावा करून तंबूत परतला. त्यामुळे विराट कोहलीने सावध खेळी करण्यास सुरूवात केली. विराट कोहलीने 6 चौकार आणि 1 षटकार मारला. त्याने 34 चेंडूत 49 धावांची खेळी केली आणि बाद झाला. त्याचं अर्धशतक फक्त एका धावेने हुकलं. पण ऑरेंज कॅपचा मानकरी ठरला.

ऑरेंज कॅप विराट कोहलीकडे

विराट कोहली 49 धावांवर असताना आवेश खानच्या गोलंदाजीवर झेल बाद झाला. निकोलस पूरनने त्याचा झेल पकडला आणि तंबूचा रस्ता दाखवला. पण विराट कोहलीने तिथपर्यंत ऑरेंज कॅप आपल्या डोक्यावर घातली होती. विराट कोहलीने 49 धावांची खेळी केली आणि सनरायझर्स हैदराबादच्या हेनरिक क्लासेनच्या पुढे गेला. हेनरिक क्लासेनने 5 सान्यात दोन अर्धशतकांच्या मदतीने 224 धावा केल्या होत्या. आता विराट कोहलीने 2 अर्धशतकांच्या मदतीने पाच सामन्यात 228 धावा केल्या आहे. त्यामुळे ऑरेंज कॅपचा मानकरी ठरला आहे. आता पुढच्या सामन्यात ही कॅप कोण खेचून घेतं हे पाहणं औत्सुक्याचं ठरेल.

एक विक्रम हुकला

आयपीएल स्पर्धेत 300 षटकारांचा विक्रम थोडक्यासाठी हुकला. या सामन्यात 2 षटकार मारताच विराट कोहलीचं षटकारांचं त्रिशतक पूर्ण झालं असतं. पण विराट कोहलीने एकच षटकार मारला. आता त्याला हा विक्रमासाठी पुढच्या सामन्याची वाट पाहावी लागणार आहे. 300 षटकार मारण्याचा विक्रम ख्रिस गेल आणि रोहित शर्माच्या नावावर आहे. ख्रिस गेलने 141 डावात 357 षटकार, तर रोहित शर्माने 271 डावात 310 षटकार मारले आहेत. आता आरसीबीचा पुढचा सामना दिल्ली कॅपिटल्सशी होणार आहे. या सामन्यात एक षटकार मारताच विराट कोहली या यादीत सहभागी होईल.