Video : हैदराबादविरुद्धच्या सामन्यात रोहित शर्माला आलं रडू! मुंबई इंडियन्स संघात नेमकं काय चाललंय?

आयपीएल 2024 स्पर्धेत मुंबई इंडियन्सचं प्लेऑफमधील स्थान संपुष्टात आलं आहे. मात्र असं असलं तरी पुढील प्रत्येक सामना आत्मसन्मानासाठी लढला जाईल हा पवित्रा आहे. आता मुंबई इंडियन्सला साखळी फेरीत फक्त दोन सामने खेळायचे आहे. आतापर्यंत खेळलेल्या 12 सामन्यापैकी 4 सामन्यात विजय आणि 8 सामन्यात पराभवाचं तोंड पाहिलं आहे. सलग पराभव होत असताना सनरायझर्स हैदराबादला हरवण्यात मुंबईला यश आलं आहे. मुंबईने हैदराबादला 7 गडी राखून पराभूत केलं आहे. सूर्यकुमार यादवच्या शतकी खेळीच्या जोरावर मुंबईने 17.2 षटकात 174 धावांचं आव्हान गाठलं. मात्र असं असताना माजी कर्णधार रोहित शर्मा मात्र उदास असल्याचं दिसून आलं. ड्रेसिंग रुममध्ये त्याच्या रडतानाचा व्हिडीओ सोशल मीडियावर व्हायरल होत आहे. रोहित शर्मा हैदराबादविरुद्धच्या सामन्यात वानखेडे मैदानावर पुन्हा एकदा अपयशी ठरला. पाच चेंडूंचा सामना केला आणि एक चौकार मारत पॅट कमिन्सच्या गोलंदाजीवर क्लासेनला झेल देऊन बाद झाला.

टी20 वर्ल्डकप जवळ असताना रोहित शर्माच्या फॉर्मची पुन्हा एकदा चर्चा रंगली आहे. आयपीएलमध्ये सुरुवातीला चांगली कामगिरी करणाऱ्या रोहित शर्माची गाडी रुळावरून घसरल्याचं दिसत आहे. रोहित शर्माने पहिल्या सात सामन्यात 297 धावा केल्या होत्या. यात दिल्ली कॅपिटल्सविरुद्ध 49, चेन्नई सुपर किंग्सविरुद्ध नाबाद 105 या खेळींचा समावेश आहे. मात्र पुढच्या पाच सामन्यात एकून 34 धावाच केल्या. राजस्थान रॉयल्स, दिल्ली कॅपिटल्स, लखनौ सुपर जायंट्स, कोलकाता नाईट रायडर्सनंतर सनरायझर्स हैदराबादविरुद्ध फेल झाला. या पाच सामन्यात त्याचा सर्वोत्तम स्कोअर हा 11 आहे. त्यामुळे हाच संदर्भ पकडून रोहित शर्माला ड्रेसिंग रुममध्ये अश्रू अनावर झाले असावे असं चाहत्यांचं म्हणणं आहे.

If you are happy when someone cries, then humanity is dead inside you. Rohit Sharma will make a comeback once again and then you will not find a place to hide your shameless face. pic.twitter.com/vbikE3puFB

— Satya Prakash (@Satya_Prakash08) May 6, 2024

Rohit was seen broken and crying for his string of worst performances in IPL 🥺💔

Hope he delivers big in WC 🤞 pic.twitter.com/JCNzXvETIW

— Vishwa (@itis_vishwa) May 6, 2024

रोहित शर्माला वनडे वर्ल्डकप स्पर्धेच्या अंतिम फेरीत असेच अश्रू अनावर झाले होते. पॅट कमिन्सच्या नेतृत्वातील ऑस्ट्रेलिया संघाने पराभवाचं पाणी पाजलं होतं. त्यामुळे जेतेपदाचं स्वप्न भंग झालं होतं. त्यामुळे नेटकरी हा संदर्भही जोडत असून कमेंट्स करत आहेत. दुसरीकडे, रोहित शर्माला आपल्या फलंदाजीची ताकद दाखवण्यासाठी आणखी दोन संधी आहेत. उर्वरित दोन सामन्यात चांगली फलंदाजी केली तर नक्कीच वर्ल्डकप स्पर्धेपूर्वी बुस्टर मिळेल.