6,6,6,6,6,6,6,6,6… अवघ्या 36 चेंडूंत 95 धावा कुटल्या; धुरंधर खेळाडूचा मैदानात जलवा, वादळी खेळीनं वेधलं लक्ष
Tejasvi Dahiya 95 Off 36 Balls in SMAT 2026: केकेआरने सोडलेल्या खेळाडूने 36 चेंडूंमध्ये अनेक षटकारांसह 95 धावा ठोकल्या. संघातून बाहेर पडल्यानंतर बॅटने उत्तर दिले आहे.

आयपीएल 2027 हंगामासाठी 16 डिसेंबर रोजी मिनी लिलाव होणार आहे. या लिलावापूर्वी 17 नोव्हेंबर रोजी सर्व 10 संघांनी आपले कायम ठेवलेले खेळाडू जाहीर केले. अनेक खेळाडूंना संघातून मुक्त केले. कोलकाता नाईट रायडर्सनेही काही खेळाडूंना मुक्त केले. अशाच खेळाडूंपैकी एक तेजस्वी दहिया होता. त्याने आता अवघ्या 36 चेंडूंमध्ये 95 धावांची धडाकेबाज खेळी करून संघाला सय्यद मुश्ताक अली ट्रॉफी जिंकण्यास मदत केली.
दिल्लीचा यष्टीरक्षक फलंदाज तेजस्वी दहियाने शेजारील हरियाणाविरुद्ध ही खेळी केली. रविवार 22 नोव्हेंबर रोजी इंदूरमध्ये खेळल्या गेलेल्या या सामन्यात दिल्लीने प्रथम फलंदाजी केली. कर्णधार प्रियांश आर्य, यश धुल आणि नितीश राणा यांनी संघाला भक्कम सुरुवात करून दिली. प्रियांशने 40 चेंडूंमध्ये 62 धावा करत शानदार अर्धशतक झळकावले. तेजस्वी या डावाचा स्टार ठरला.
24 वर्षीय यष्टीरक्षक-फलंदाज तेजस्वी दहिया चौथ्या क्रमांकावर फलंदाजीला आला. त्याने लगेचच षटकार आणि चौकारांचा पाऊस सुरू केला. त्याने अवघ्या 20 चेंडूंमध्ये आपले अर्धशतक पूर्ण केले. त्यानंतरही त्याने आपला आक्रमक खेळ सुरू ठेवला. तो शतकाच्या अगदी जवळ पोहोचला होता. डावाच्या शेवटच्या चेंडूवर त्याला पाच धावांची गरज होती, पण तो 95 धावांवर बाद झाला.
केवळ 36 चेंडूंमध्ये केलेल्या या स्फोटक खेळीत तेजस्वीने नऊ षटकार आणि सहा चौकार ठोकले. त्याचा स्ट्राईक रेट 263.88 होता. यामुळे दिल्लीला 232 धावांपर्यंत मजल मारता आली आणि त्यानंतर हरियाणाला 189 धावांवर रोखत 43 धावांनी सामना जिंकता आला. अर्थातच तेजस्वीला सामनावीर म्हणून गौरवण्यात आले. तेजस्वीसाठी ही खेळी महत्त्वपूर्ण होती, कारण लिलावाच्या अगदी आधी त्याने आपल्या फलंदाजीचे कौशल्य दाखवून दिले.
मात्र, या तरुण फलंदाजाला संघातून काढून टाकून आपण चूक केली, असा संदेशही यातून कोलकाता नाईट रायडर्सला जाईल. त्याला संघात कायम ठेवण्याची घोषणा 17 नोव्हेंबर रोजी करण्यात आली होती आणि तेव्हापासून तीन सामन्यांमधील हे तेजस्वीचे दुसरे अर्धशतक आहे. गेल्या वर्षी केकेआरने त्याला 3 कोटी रुपयांना संघात घेतले होते, पण तो केवळ दोन सामने खेळून 11 धावाच करू शकला होता.