ENG vs NEP : आम्ही इथे…, इंग्लंडला ठसवल्यानंतर नेपाळच्या कॅप्टनची रोखठोक प्रतिक्रिया, रोहित काय म्हणाला?
Rohit Paudel Post Match Presentation : नेपाळ क्रिकेट टीमने आयसीसी टी 20i वर्ल्ड कप 2026 स्पर्धेतील आपल्या पहिल्याच सामन्यात धमाका केला. नेपाळला पहिला सामना जिंकता आला नाही, मात्र त्यांनी इंग्लंड सारख्या तगड्या संघाला टफ फाईट दिली.
आयसीसी टी 20I वर्ल्ड कप 2026 स्पर्धेला दणक्यात सुरुवात झाली. या स्पर्धेत मुख्य संघांसह नवखे संघही सहभागी झाले आहेत. नवख्या संघांच्या कामगिरीमुळे त्यांना लिंबुटिंबु म्हणून गृहित धरलं जातं. मात्र या स्पर्धेच्या सुरुवातीलाच तुलनेत नवख्या असणार्‍या संघांनी आपल्याला गृहित धरु नये, हे आपल्या कामगिरीतून दाखवून दिलंय. नेदरलँड्सने स्पर्धेतील पहिल्याच सामन्यात पाकिस्तानला जेरीस आणलं होतं. यूएसएने गतविजेत्या टीम इंडियाला झुंजवलं. त्यानंतर आज 8 फेब्रुवारीला नेपाळने इंग्लंडला रडकुंडीला आणलं. इंग्लंडचा नेपाळ विरुद्ध अवघ्या 4 धावांनी विजय झाला. नेपाळने 185 धावांचा पाठलाग करताना जोरदार लढत दिली. मात्र नेपाळचे प्रयत्न अवघ्या 4 धावांनी कमी पडले. नेपाळला 20 ओव्हरमध्ये 180 धावांपर्यंतच पोहचता आलं.
इंग्लंडने हा सामना जिंकून आपली लाज राखली आणि उलटफेर होण्यापासून स्वत:चा बचाव केला. इंग्लंड विरूद्धच्या या पराभवानंतर नेपाळचा कॅप्टन रोहित पौडेल याने त्याला आपल्या संघातील खेळाडूंचा अभिमान असल्याचं म्हटलं. तसेच रोहितने आपण इथे (स्पर्धेत) फक्त सहभागी व्हायला आलो नाहीत, असं म्हणत इतर संघांना बजावलंय. रोहितने काय भावना व्यक्त केल्या हे जाणून घेऊयात.
रोहितने काय म्हटलं?
“मला माझ्या संघाचा अभिमान आहे. मुलांनी (खेळाडूंनी) विजयासाठी स्वत:ला झोकून दिलं. वर्ल्ड कप स्पर्धेसाठी आलो तेव्हा आम्हाला विश्वास होता की आम्ही चांगली कामगिरी करु शकतो. आम्ही इथे फक्त सहभागी होण्यासाठी आलेलो नाहीत”, असं म्हणत रोहितने इतर संघांना सतर्क राहण्याचा इशारा दिला.
“आम्ही पूर्ण प्रयत्न केले”
“निकाल आमच्या बाजूने लागला नाही. मात्र आम्ही सर्व आघाड्यांवर 100 टक्के प्रयत्न केले. सॅम करन याने शेवटच्या ओव्हरमध्ये चांगली बॉलिंग केली. आम्ही सामन्याचा शेवट विजयाने करण्यासाठी प्रयत्न करु”, असंही रोहितने नमूद केलं.
रोहित पौडेलचा थेट इशारा
Nepal Captain said “Disappointment is there but I am proud of my team – we had the belief when we came to the World Cup, we didint come here just to participate”. pic.twitter.com/GegY5hjcBD
— Johns. (@CricCrazyJohns) February 8, 2026
नेपाळचे टी 20i वर्ल्ड कप 2026 स्पर्धेतील उर्वरित सामने
दरम्यान नेपाळ या पराभवासह या मोहिमेत विजयी सुरुवात करण्यात अपयशी ठरली. नेपाळचा या स्पर्धेसाठी सी ग्रुपमध्ये समावेश करण्यात आला आहे. नेपाळ आपल्या पुढील 3 सामन्यांत अनुक्रमे इटली, वेस्ट इंडिज आणि स्कॉटलँड विरुद्ध भिडणार आहे. नेपाळला पुढील फेरीत पोहचण्यासाठी या 3 सामन्यांत विजय मिळवणं महत्वाचं ठरणार आहे.
