‘सिक्सर किंग’च्या IPL प्रवासात मोठं वळण! ज्या संघाने एका वर्षात बाहेरचा रस्ता दाखवला, त्याच संघाचा युवराज सिंह प्रशिक्षक बनला

भारताचा माजी अष्टपैलू खेळाडू आणि दोन वेळा विश्वचषक विजेता युवराज सिंग आयपीएलमध्ये एका नव्या भूमिकेत दिसणार आहे. भारतीय क्रिकेट संघाचा माजी अष्टपैलू खेळाडू युवराज सिंग याची २०२७ च्या इंडियन प्रीमियर लीग स्पर्धेपूर्वी दिल्ली कॅपिटल्स संघाच्या सहायक आणि फलंदाजी प्रशिक्षकपदी नियुक्ती करण्यात आली आहे. भारतासाठी ३०४ एकदिवसीय, ४० कसोटी आणि ५८ टी-२० सामने खेळलेल्या या ४४ वर्षीय खेळाडूने देशाला दोन विश्वचषक जिंकण्यात महत्त्वाची भूमिका बजावली होती.

युवराज सिंगने शुभमन गिल, अभिषेक शर्मा आणि प्रभसिमरन सिंग यांच्यासह अनेक उदयोन्मुख भारतीय खेळाडूंना मार्गदर्शनही केले आहे. आता तो प्रशिक्षक म्हणून दिल्ली कॅपिटल्सला त्यांचे पहिले आयपीएल विजेतेपद मिळवून देण्यास मदत करेल, आणि यासह तो पहिल्यांदाच एखाद्या संघाच्या प्रशिक्षण चमूमध्ये औपचारिकपणे सामील होत आहे. “दिल्ली कॅपिटल्ससोबत माझ्या आयुष्यात एक नवीन अध्याय सुरू करण्यास मी खूप उत्सुक आहे. या फ्रँचायझीशी माझा दीर्घकाळचा संबंध आहे आणि मी तिच्या मालकांना चांगले ओळखतो. त्यामुळे ही संधी माझ्यासाठी विशेष आहे, असे युवराजने फ्रँचायझीने जारी केलेल्या निवेदनात म्हटले आहे.

युवराज सिंग म्हणाला की, यावेळी दादा (सौरव गांगुली) यांच्यासोबत प्रशिक्षक म्हणून काम करण्यास मी देखील उत्सुक आहे. मला क्रिकेट प्रशिक्षणाची प्रचंड आवड आहे आणि या अत्यंत प्रतिभावान संघासोबत काम सुरू करण्यास मी आतुर आहे. मला खात्री आहे की हा एक रोमांचक प्रवास असेल आणि संघाच्या यशात योगदान देण्यासाठी मी माझे सर्वोत्तम प्रयत्न करेन. युवराजच्या नियुक्तीमुळे दिल्ली फ्रँचायझीसोबतचे त्याचे जुने संबंध पुन्हा एकदा चर्चेत आले आहेत.

दिल्ली फ्रँचायझीने २०१५ मध्ये युवराजला विक्रमी १६ कोटी रुपयांना संघात घेतले होते. ज्यामुळे तो आयपीएलच्या इतिहासातील सर्वात महागडा खेळाडू ठरला. त्या हंगामात युवराज फ्रँचायझीसाठी सर्व १४ सामने खेळला होता. मात्र त्या हंगामात त्याची फलंदाजीची कामगिरी निराशाजनक होती. जीएमआर स्पोर्ट्सचे संस्थापक आणि सह-मालक किरण कुमार ग्रंथी म्हणाले की, युवराजची शानदार कारकीर्द, स्पर्धात्मक स्वभाव आणि खेळाची सखोल समज संघाला नवीन उंचीवर घेऊन जाईल.

दिल्ली कॅपिटल्सचे सह-मालक आणि जेएसडब्ल्यू स्पोर्ट्सचे संस्थापक पार्थ जिंदाल म्हणाले, युवराज हा भारतीय क्रिकेटमधील सर्वात मोठ्या सामना-विजेत्यांपैकी एक आहे. युवा खेळाडूंना मार्गदर्शन करण्याचा त्याचा अनुभव, त्याची जिंकण्याची मानसिकता आणि खेळाडूंशी जुळवून घेण्याची त्याची क्षमता आमच्या संघासाठी अमूल्य ठरेल. त्याला दादा आणि उर्वरित प्रशिक्षण कर्मचाऱ्यांसोबत काम करताना पाहणे विशेष असेल.