Sunil Gavaskar: भारत हरण्यामागे फक्त तो एकटा..,गावस्करांनी थेट नाव घेतलं अन् व्हिलन ठरवलं, कोचलाही खडसावलं
Sunil Gavaskar On Team India: माजी दिग्गज फलंदाज सुनील गावस्कर यांनी वेस्ट इंडिज विरुद्ध भारताच्या पराभवामागे कोण जबाबदार आहे ते बोलून दाखवले आहे.
IND vs WI T20: दुसऱ्या टी२० सामन्यात भारतीय संघ २५० धावांचा बचाव करण्यात अपयशी ठरला, ज्यामुळे भारतीय गोलंदाजांवर टीका झाली. भारताच्या फलंदाजांनी २० षटकांत २४९ धावा करून गोलंदाजांना धावसंख्या वाचवण्यासाठी पुरेशा धावा दिल्या होत्या. तर दुसरीकडे शाई होप आणि रदरफोर्ड यांनाी आक्रमक खेळी खेळली. २४९ धावा करुनही भारतीय संघाचा पराभव कसा झाला यावर आता माजी दिग्गज फलंदाज सुनील गावस्कर यांनी कारण बोलून दाखवली.
शाई होपने ४५ चेंडूंमध्ये १०२ धावांची नाबाद खेळी केली, तर शेर्फेन रदरफोर्डने ३७ चेंडूंमध्ये ८४ धावा करून सामन्याला एकतर्फी बनवले. वेस्ट इंडिजने ९ चेंडू शिल्लक असताना ६ गडी राखून सामना जिंकला. गावस्कर म्हणाले, “माझ्या मते, चूक सातव्या षटकात झाली. जेव्हा वेगवान गोलंदाजांनी भारताला सहा षटकांत तीन बळी मिळवून दिले होते, तेव्हा सातवे षटकही वेगवान गोलंदाजानेच टाकायला हवे होते. त्या सातव्या षटकातील शिवम दुबेची गोलंदाजी सामन्याचा टर्निंग पॉइंट ठरली. मला वाटते की, जर अर्शदीपने तिथे गोलंदाजी केली असती, तर भारताला आणखी एक विकेट मिळाली असती. तीन विकेट गमावल्यानंतर वेस्ट इंडिज दबावाखाली होते. पण तिथे दुबेला गोलंदाजीसाठी आणणे ही एक चूक होती.”
गावस्कर पुढे म्हणाले, “मला वाटले होते की काही चांगल्या षटकांनंतर भारत २३५-२४० च्या आसपास धावा करेल. भारताने ९ धावा जास्त केल्या. त्यामुळे, हे स्पष्ट आहे की फलंदाजांना दोष देता येणार नाही. गोलंदाजांनी जशी गोलंदाजी करायला हवी होती तशी केली नाही, हे पूर्णपणे स्पष्ट आहे असे मला वाटत नाही. खरे तर, गोलंदाजी प्रशिक्षकाला विचारणे मनोरंजक ठरेल की त्यांना या गोलंदाजांकडून काय अपेक्षा होती आणि त्यांनी ती पूर्ण केली का.”
होप आणि रदरफोर्डच्या खेळीने सामना निश्चित केला. होप आणि रदरफोर्डच्या चौथ्या विकेटसाठीच्या १२० धावांच्या भागीदारीने सामन्याचे चित्र पालटले. एके वेळी वेस्ट इंडिजचे ५८ धावांत तीन गडी बाद झाले होते, पण सातव्या षटकात शिवम दुबे गोलंदाजीसाठी आला. तणावपूर्ण परिस्थितीत गोलंदाजीतील या बदलामुळे दोन्ही फलंदाजांवरील दबाव कमी झाला. वेस्ट इंडिजच्या डावाच्या सातव्या षटकात १४ धावा निघाल्याने दोन्ही फलंदाजांचा आत्मविश्वास वाढला. त्यानंतर दोघांनीही स्फोटक फलंदाजी करत सामना संपवला. मालिका आता १-१ अशी बरोबरीत आहे.
