लाज वाटली पाहिजे तुला… ई सिगारेट पिणाऱ्या रियानला नेटकऱ्यांनी झापलं, प्रचंड संताप

इंडिय़न प्रीमिअर लीगमध्ये (IPL 2026) मंगळवारी मोठा विजय मिळवूनही राजस्थान रॉयल्सचा (Rajasthan Royals) संघ आणि कर्णधार रियान पराग (Riyan Parag) हे दोघेही वादाच्या भोवऱ्यात सापडले आहेत. पंजाब किंग्सविरुद्धच्या सामन्यादरम्यान, राजस्थानचा कर्णधार रियान पराग हा ड्रेसिंग रूममध्ये बसून ई-सिगारेट ओढताना कॅमेऱ्यात कैद झाला, तो व्हिडीओ सोशल मीडियावर व्हायरल होताच एकच गदारोळ झाला.

काल, म्हणजेच 28 एप्रिल रोजी मुल्लानपूर येथील महाराजा यादवेंद्र सिंह आंतरराष्ट्रीय क्रिकेट स्टेडियमवर खेळल्या गेलेल्या सामन्यादरम्यान ही घटना घडली. राजस्थान रॉयल्सच्या डावाच्या 16 व्या षटकादरम्यान, कॅमेरा ड्रेसिंग रूमकडे वळला, पण तिथे बसलेला पराग हा व्हेपिंग करताना, ई-सिगारेट ओढताना दिसला. त्याच्या शेजारी उभा असलेला यशस्वी जयस्वाल मैदानाकडे बोट दाखवत होता.

भारतात बंदी

खरंतर इलेक्ट्रॉनिक सिगारेट प्रतिबंधक कायदा 2019 अन्वये, भारतात ई-सिगारेट आणि व्हेपिंग उपकरणांवर कठोर बंदी आहे. याशिवाय, स्टेडियम आणि ड्रेसिंग रूममध्ये धूम्रपान करण्यास सक्त मनाई असते. त्यामुळे, एक आंतरराष्ट्रीय खेळाडू आणि कर्णधार असलेल्या रियान परागचे हे वर्तन गंभीर मानले जाते.

सूत्रांनी दिलेल्या माहितीनुसार, बीसीसीआय हे प्रकरण हलक्यात घेणार नाही. त्यामुळे ई-सिगारेट ओढणाऱ्या रियान परागवर दंड किंवा इतर कठोर कारवाई होऊ शकते. यापूर्वी, राजस्थान रॉयल्सचे व्यवस्थापक रोमी भिंदर यांना पीएमओए (खेळाडू आणि सामना अधिकारी क्षेत्र) नियमांचे उल्लंघन केल्याबद्दल दंड ठोठावण्यात आला होता.

कालच्या मॅचबद्दल सांगायचं झालं तर 223 धावांचं हे मोठं आव्हान राजस्थानने 6 गडी राखून पूर्ण केलं आणि पंजाबची विजयी विजयी मालिका संपुष्टात आणली. यशस्वी जैस्वाल आणि डोनोव्हन फरेरा यांनी अर्धशतकं झळकावली, तर परागने 16 चेंडूंमध्ये 29 धावा केल्या. तो युझवेंद्र चहलच्या गोलंदाजीवर बाद झाला. मात्र, सामन्यानंतर विजयापेक्षा परागभोवतीचा वादच अधिक चर्चेत राहिला.

सोशल मीडियावर यूजर्स नाराज

ई-सिगारेट ओढताना रियान पराग दिसल्यानंतर सोशल मीडियावर यूजर्सनी, त्याच्यावर जोरदार टीका केली, अनेकांनी याला “लाजिरवाणे नेतृत्व” म्हटलं, तर काहींनी बीसीसीआयकडे, कठोर कारवाईची मागणी केली.

जेव्हा संघात तरुण खेळाडूंचा भरणा आहे, तेव्हा कर्णधाराचे असे वर्तन एक वाईट उदाहरण म्हणून दिसतं असा मुद्दाही अनेकांनी उपस्थित केला. रियान परागचे व्हेपिंग प्रकरण समोर येताच सोशल मीडियावर मोठा गदारोळ उसळला. चाहत्यांनी कर्णधाराच्या जबाबदारीवर आणि त्याच्या वागण्यावर, दोन्हींवर प्रश्नचिन्ह उपस्थित केले.