Samreen Kaur: मला तशी कोणाची गरज नाहीये…अर्शदीप सिंगची गर्लफ्रेंड समरीन कौर भडकली, पोस्ट करत सुनावलं

Samreen Kaur  Post: भारतीय वेगवान गोलंदाज अर्शदीप सिंगची प्रेयसी आणि मॉडेल-अभिनेत्री समरीन कौरने सोशल मीडियावर तिच्या नात्यावर टीका करणाऱ्यांना सडेतोड उत्तर दिले आहे. अलीकडेच, सोशल मीडियावरी यूजरने समरीनवर प्रसिद्धी आणि पैशांसाठी अर्शदीप सिंगला डेट करत असल्याचा आरोप केला होता, ज्यावर समरीनने एक लांबलचक इंस्टाग्राम स्टोरी शेअर करून मौन सोडले. समरीनने सोशल मीडियाच्या दुटप्पीपणावर प्रश्नचिन्ह उपस्थित केले आणि म्हटले की, लोक नेहमीच महिलांवर सवाल उपस्थित करत असतात.

समरीनने काय लिहिले?

समरीनने तिच्या इंस्टाग्राम स्टोरीवर लिहिले, “मी या जगाचे जितके अधिक निरीक्षण करते, तितके मला जाणवते की सोशल मीडियावरील लोक किती ढोंगी आहेत. जर तुम्ही तुमच्या जोडीदाराला गुप्त ठेवले, तर म्हटले जाते की तुम्हाला त्यांचा अभिमान नाही. जर तुम्ही तुमचे प्रेम उघडपणे व्यक्त केले, तर म्हटले जाते की ते प्रसिद्धीसाठी आहे. जर तुमचे स्वतःचे स्टॅणडर्ड असतील, तर तुम्ही स्वार्थी आहात, आणि जर तुम्ही एखाद्यावर खरे प्रेम करत असाल, तर म्हटले जाते की तुम्ही त्यांना सोडून द्याल.”

आपल्या उत्पन्नाबद्दल आणि स्वावलंबनाबद्दल बोलताना समरीन पुढे म्हणाली, “मी वयाच्या १७ व्या वर्षापासून काम करत आहे, त्यामुळे तशी कोणाची गरज नाही आणि स्वतःची काळजी घेत आहे. मी २० हून अधिक देशांमध्ये प्रवास केला आहे आणि माझे स्वतःचे आयुष्य घडवले आहे. देवाच्या कृपेने, मी लहानपणापासूनच माझी जीवनशैली सांभाळू शकले आहे. मला माझे वैयक्तिक आयुष्य कोणालाही समजावून सांगण्याची गरज नाही. अर्शदीपमुळे माझे आयुष्य पूर्ण होते आणि अशी व्यक्ती माझ्या आयुष्यात असल्याबद्दल मी स्वतःला भाग्यवान समजते. ज्यांना माझ्या पोस्ट्सबद्दल समस्या आहे, ते माझे पेज सोडून जाऊ शकतात.”

समरीनच्या पोस्टनंतर, अर्शदीप सिंग स्वतः तिच्या समर्थनार्थ पुढे आला. समरीनची पोस्ट पुन्हा शेअर करत, अर्शदीपने ट्रोलर्सना इतरांच्या आयुष्यात हस्तक्षेप न करण्याचा सल्ला दिला. अर्शदीपने लिहिले, “मला तुझा अभिमान आहे, बेबी. तू खूप कणखर आहेस. जे आपल्या नात्याबद्दल विनाकारण काळजी करत आहेत, त्यांनी थोडा वेळ थांबावे. जगा आणि जगू द्या. इंटरनेट आणि जगाला एक चांगले स्थान बनवा. प्रेम पसरवा आणि इतरांनाही आनंदी राहू द्या. मी देवाचे आभार मानतो की मला समरीनसारखा निर्मळ मनाचा आणि प्रेमळ जोडीदार मिळाला आहे. “