WhatsApp चा आला कंटाळा? या सोप्या पद्धतीने खाते Delete करा

नवी दिल्ली | 17 February 2024 : या डिजिटल जगतात, सोशल मीडिया हे आपल्या आयुष्याचा अविभाज्य भाग झाले आहे. काही घडामोड, मनातील भावना व्यक्त करण्यासाठी आता अगदी हाताळण्याजोगे प्लॅटफॉर्म हाती आले आहे. त्यात व्हॉट्सॲप हे सर्वाधिक लोकप्रिय मॅसेजिंग ॲप आहे. सकाळी उठल्यापासून ते झोपेपर्यंत जगभरातील कोट्यावधी युझर्स या ॲपवर पडीक असतात. पण अनेकदा महत्वाची कामे, सुट्टी एन्जॉय करताना, अभ्यास करताना अथवा डिजिटल डिटॉक्ससाठी अनेकांन व्हॉट्सॲप बंद करायचे असते. तुम्ही पण व्हॉट्सॲपला कंटाळला असाल तर या सोप्या पद्धतीने ते डिलीट करता येते.

ही गोष्ट ठेवा लक्षात

• व्हॉट्सॲप तुम्हाला डिलीट करायचे असेल तर सर्वप्रथम एक महत्वाची गोष्ट लक्षात ठेवा. स्मार्टफोनवरुन व्हॉट्सॲप डिलीट केले म्हणजे झाले असे होत नाही. तुमच्या स्मार्टफोनमधून व्हॉट्सॲप हटविण्यापूर्वी तुमचे खाते निष्क्रिय करणे आवश्यक आहे. तुम्ही जर केवळ स्मार्टफोनमधून व्हॉट्सॲप डिलीट केले तरी खाते मात्र सक्रिय असेल. तुमचे मित्र, ओळखीचे, नातेवाईक तुम्हाला मॅसेज पाठवू शकतील. पण ते मॅसेज तुम्हाला मिळणार नाहीत.
• WhatsApp वरील तुमचे खाते हटविण्यापूर्वी पुन्हा एकदा विचार करा. कारण एकदा तुमचे खाते डिलिट झाले तर ते परत मिळविणे सोपे नाही. तुम्ही चुकून खाते डिलीट केले तर ते परत मिळवणे अवघड असल्याचे व्हॉट्सॲपचे म्हणणे आहे. त्यामुळे पूर्ण विचारानेच हे खाते निष्क्रिय करा.

असे करा खाते डिलीट

• तुमच्या स्मार्टफोनमधील व्हॉट्सॲप खाते उघडा
• वरील उजव्या बाजूच्या तीन डॉट्सवर क्लिक करा
• Setting हा पर्याय निवडा. त्यातील Account वर क्लिक करा
• त्यात Delete My Account वर जा, तुमचा मोबाईल क्रमांक टाका
• हे खाते का डिलीट करत आहात, याचे कारण द्या, ते ड्रॉपबॉक्समध्ये दिसेल
• आता डिलीट माय अकाऊंटवर क्लिक करा

व्हॉट्सॲप डिलीट झाल्यावर काय होते

व्हॉट्सॲप डिलीट झाल्यावर तुमची मॅसेज हिस्ट्री पुसल्या जाते. तुम्ही विविध व्हॉट्सॲप ग्रुपमधून बाहेर होता. तुमचे गुगल ड्राईव्ह बॅकअप पण डिलीट होते. तसेच एखाद्या चॅनलला जोडलेले असाल, एखाद्या चॅनलचे एडमिन असाल तर त्यातून बाहेर होता. तुम्ही खाते डिलीट केल्यानंतर तुमची माहिती पूर्णपणे डिलीट होण्यासाठी प्रक्रिया सुरु झाल्यापासून 30 दिवस लागत असल्याचा व्हॉट्सॲपचा दावा आहे.