15 सोन्याचे कलश, 45 किलो चांदी… हवेलीत सापडला अचानक खजिना, नेमकं कुठे घडलं?

कल्पना करा जर तुमच्या घरात तुमच्या पणजोबांनी किंवा त्या आधीच्या पिढीने लपवून ठेवलेला खजिना अचानक सापडला तर. अशीच एक घटना समोर आली आहे. एका जुन्या हवेलीमधून कोट्यवधी रुपयांचा खजिना सापडला आहे. हा खजिना हवेलीच्या मालकाने गायब झाल्याची तक्रार केल्यानंतर समोर आला आहे. आता नेमकं काय झालं होतं जाणून घ्या…

ही घटना राजस्थानातील जयपुरमधून समोर आली आहे. त्रिपोलिया बाजारातील विद्याधरचा रस्ता भागात एका हवेलीत कोट्यवधी रुपयांचा खजिना मिळाल्याचा दावा करण्यात आला आहे. या घटनेने सर्वत्र खळबळ माजली आहे. हवेली मालकाने ठेकेदारावर सोने-चांदी आणि जुने नाणे गायब केल्याचा आरोप केला आहे. पोलिसांनी याप्रकरणी गुन्हा दाखल करून तपास सुरू केला आहे. सेठी परिवाराचा व्यापारी इतिहास आणि स्थानिकांच्या दाव्यांमुळे ही घटना अधिक रंजक बनली आहे.

हवेलीचे मालक राहुल सेठी यांनी माणकचौक पोलिस ठाण्यात तक्रार दाखल केली आहे. त्यांच्या आरोपानुसार, हवेलीच्या खोदकामादरम्यान सुमारे ४० ते ४५ किलो चांदीचा स्लॅब्स, सोन्याच्या नाण्यांनी भरलेले १४ ते १५ कलश आणि ८ ते १० हजार जुनी चांदीची नाणी मिळाली. ठेकेदार आणि त्याच्या साथीदारांनी हे सर्व आपसात वाटून घेतल्याचा आरोप आहे. राहुल सेठी यांनी पोलिसांना सांगितले की, बांधकाम सुरू करण्यापूर्वी ठेकेदाराला स्पष्ट सूचना दिल्या होत्या की, खोदकामात कोणतीही मौल्यवान वस्तू मिळाली तर ती कुटुंबाला सुपूर्द करावी. नंतर एक कामगाराने संपूर्ण प्रकरण उघड केले. दोन व्हिडीओही मिळाले असून ते पोलिसांच्या ताब्यात देण्यात आले आहेत.

स्थानिकांच्या मते…

स्थानिक रहिवासी अमित यांनी सांगितले की, “ही जुनी हवेली आमच्या समोरच होती. सव्वा वर्षापूर्वी ती पाडण्यात आली. तेव्हापासून खोदकामात खजाना मिळाल्याच्या चर्चा सुरू आहेत. बद्रीनारायण सेठी खूप श्रीमंत होते, म्हणून लोकांना वाटते की हवेलीत जुना खजिना असू शकतो.” स्थानिक दुकानदार राजा रामचंदानी म्हणाले, “सव्वा वर्षापूर्वी हवेली पाडण्याचे काम सुरू झाले तेव्हा लोक चर्चा करत होते की, इथे सोने-चांदी मिळेल. राहुल सेठी यांनी तेव्हा तपासणीही केली होती आणि काही खजिना मालकाला मिळाल्याची चर्चा होती. आता ऐकायला येत आहे की, ठेकेदाराने खजिना बळकावला आहे. पण खजिना मिळाला असेल तर तो हवेली मालकाचाच आहे.”

सेठी परिवाराचा इतिहास

स्थानिकांच्या माहितीनुसार, राहुल सेठी यांचे आजोबा बद्रीनारायण सेठी १९७० च्या दशकात जयपुर आणि मुंबईतील मोठ्या व्यापाऱ्यांमध्ये गणले जात होते. मुंबईत त्यांचा ‘जीडी मावा वाला अँड कंपनी’ नावाचा मोठा मिठाईचा व्यवसाय होता. सेठी परिवाराची श्रीमंती संपूर्ण शहरात प्रसिद्ध होती. बद्रीनारायण सेठी यांचे दोन विवाह झाले होते. पहिल्या पत्नीपासून दुर्गालाल सेठी आणि दुसऱ्या पत्नीपासून घनश्याम सेठी. घनश्याम सेठी यांचे पुत्र तरुण सेठी आणि राहुल सेठी आहेत. हे कुटुंब जुन्या जयपुरमधील प्रतिष्ठित व्यापारी परिवारांपैकी एक मानले जाते.

आजही अनेक प्राचीन हवेल्या

विद्याधरचा रस्ता हा जयपुरातील सर्वात जुना आणि ऐतिहासिक भाग आहे. येथे आजही अनेक प्राचीन हवेल्या अस्तित्वात आहेत. त्यामुळे या कथित खजिन्याच्या चर्चा पूर्ण परिसरात रंगल्या आहेत. मात्र, अद्याप कोणत्याही सरकारी यंत्रणेने खजिना मिळाल्याची पुष्टी केलेली नाही.