असा नवरा शोधा गंssss, नवरदेव हेलिकॉप्टरमधून वरात घेऊन आला, वधूकडचे बघतच राहिले

मुलींच्या आपल्या जोडीदाराकडून भरपूर अपेक्षा असतात. त्यातही तो नेमका कसा असावा, यावर प्रत्येकीच्या वेगवेगळ्या अपेक्षा तुम्हाला दिसून येतील. “असा नवरा हवा, तसा नवरा हवा, नवरा राजबिंड हवा, गडगंज संपत्ती असणारा हवा, परी सारखा आयुष्यभर ठेवेलं, असा जोडीदार मिळावा” अशा आणि यासारख्या अनेक अपेक्षा मुलींच्या असतात. पण, एका नवरदेवानं तर आपल्या होणाऱ्या पत्नीला आणि तिच्या अवघ्या कुटुंबासह उपस्थित लोकांना श़ॉकच केले आहे. आता नेमकं या नवरदेवानं काय केलं, ते जाणून घेऊया.

कृष्णब्रह्म पोलीस ठाण्याच्या हद्दीतील सोवा गावात वधूला घेण्यासाठी नवरदेव हेलिकॉप्टरने आला तेव्हा तो पाहण्यासाठी गावकऱ्यांनी मोठी गर्दी केली होती. हा भव्य विवाह सोहळा चर्चेचा विषय ठरला. ग्रामस्थांनी दिलेल्या माहितीनुसार, ब्रह्मपूर नगरपंचायतीचे रहिवासी संजय महतो यांचा मुलगा अमित कुमार याचा विवाह कृष्णब्रह्म पोलीस ठाण्यांतर्गत सोवा गावात राहणाऱ्या शिवाजी सिंग यांची मुलगी सोनी कुमारी हिच्याशी झाला होता.

1 मार्चला हा विवाह सोहळा होणार होता, पण हे लग्न खास करण्यासाठी नवरदेव अमित कुमारने एक अनोखा निर्णय घेतला. आपल्या लग्नाची मिरवणूक भव्य आणि लक्षात राहणारी असावी, यासाठी त्यांनी हेलिकॉप्टरने जाण्याचा निर्णय घेतला. या विशेष व्यवस्थेसाठी त्यांनी सुमारे 14 लाख रुपये खर्च करून हेलिकॉप्टर मागवले.

शनिवारी सायंकाळी ब्रह्मपूर हायस्कूल मैदानातून हेलिकॉप्टरने निघालेली मिरवणूक सोवा गावात पोहोचली. ही संपूर्ण यंत्रणा सुरळीत चालविण्यासाठी जिल्हा प्रशासनाकडून परवानगी घेण्यात आली होती, त्यानंतर ब्रह्मपूर हायस्कूलच्या मैदानावर हेलिपॅड बांधण्यात आले. त्याचप्रमाणे ज्या सोवा गावात मिरवणूक उतरणार होती, त्या गावातही हेलिपॅड तयार करण्यात आले होते. हेलिकॉप्टर गावाच्या आकाशात पोहोचताच लोकांमध्ये प्रचंड उत्साह संचारला. ही अनोखी मिरवणूक पाहण्यासाठी लहान मुले, वृद्ध, महिला, सर्वजण मैदानावर जमले होते.

नवरदेव अमित कुमार सध्या मुंबईत व्यवसाय करतो, तर वडील संजय महतो गावात आपला व्यवसाय सांभाळतात. आपलं लग्न खास करण्यासाठी हेलिकॉप्टरने लग्नाची मिरवणूक काढण्याचं स्वप्न अमितने पाहिलं होतं, ते त्याला पूर्ण झालं. या अनोख्या विवाहामुळे संपूर्ण जिल्ह्यात चर्चेचे वातावरण निर्माण झाले आहे.

लोक या भव्य सोहळ्याचं कौतुक करत असतानाच सोशल मीडियावरही हे लग्न चर्चेत आहे. गावकऱ्यांनी दिलेल्या माहितीनुसार, लग्नाची मिरवणूक हेलिकॉप्टरने गावात येण्याची ही पहिलीच वेळ होती. या लग्नाने एक नवा आदर्श घालून दिला आणि तो पाहणाऱ्यांना हा अनुभव दीर्घकाळ आठवत राहील.