Pan Card Fraud : पॅन कार्ड संभाळा, नाहीतर बसेल लाखोंचा चुना, अशी होतेय फसवेगिरी

नवी दिल्ली : सायबर भामटे तुम्हाला लुटण्यासाठी अनेक प्रकारचे जाळे विणतात. आधारकार्ड, पॅनकार्डच्या (Pan Card) माध्यमातूनही ते फसवणूक करत आहे. त्यांना सावज करुन त्यांच्या खात्यातील रक्कम साफ करत आहेत. गेल्या काही महिन्यात, अनेक असे प्रकार उघड झाले आहेत की, कर्ज (Loan) इतरांच्या नावे घेऊन गंडा घालण्यात आला आहे. विशेष म्हणजे या सर्व प्रकारात ज्याच्या नावावर कर्ज उचलण्यात आले, त्याला यासंबंधीची पुसटशी कल्पना पण नव्हती. त्याच्या गावी ही नसताना त्याच्या नावावर परस्पर कर्ज उचलण्यात आले. पण हप्ता न फेडल्यानंतर आलेल्या नोटीसमुळे ग्राहकाच्या पायाखालची जमीन सरकली. त्याला झटका बसला. चौकशी अंती हे कर्जप्रकरण उघड झाले. कोरोना महामारीनंतर असे प्रकार वाढले आहेत. याप्रकरणात सायबर गुन्हेगार (Cyber Fraud) कोणत्या व्यक्तीची वैयक्तिक माहिती चोरुन असे प्रकार करतात.

कशी होते फसवणूक

परस्पर कर्ज घेऊन फसवणूक केल्या जाते. त्यासाठी व्यक्तीचे पॅन कार्ड, मोबाईल क्रमांक, व्याज पुरवठा करणाऱ्या ॲपचा वापर करण्यात येतो. तात्काळ कर्ज देणाऱ्या ॲपमुळे कमी कर्जासाठी कुठलाही पडताळा करण्यात येत नाही. त्यामुळे सायबर भामटे तुमच्या नावावर अनेक छोट्या प्रकारचे कर्ज घेऊन फरार होतात.

कर्जाबद्दल कसे कळणार

तुमच्या नावावर किती प्रकारचे कर्ज आहेत, याची माहिती तुम्हाला सहज तुमच्या CIBILस्कोरच्या माध्यमातून कळेल. सिबिल स्कोअर तुम्ही सहजरित्या पॅनकार्डच्या माध्यमातून चेक करु शकता. यामुळे हे पण सहज लक्षात येते की, तुमच्या नावावर इतर कोणी कर्ज उचलले आहे का? असे कोणते थकीत कर्ज आहे, त्याची माहिती मिळते, जे तुम्ही घेतलेच नाही.

फ्रॉड झाल्यावर काय कराल

CIBIL स्कोअर तपासल्यानंतर अनेक प्रकारचे फसवणुकीचे प्रकार समोर येतात. अशावेळी सर्वात अगोदर तुम्ही संबंधित बँकेला कळवायला हवे. तसेच पोलिसांच्या सायबर खात्याशी त्वरीत संपर्क साधायला हवा. त्याठिकाणी तुम्ही तक्रार करणे आवश्यक आहे. तसेच ही माहिती तुम्ही आयकर विभागाला पण देऊ शकता.

काय घ्याल काळजी

जर तुम्ही अशा फसवणुकीच्या कर्जप्रकरणापासून वाचू इच्छित असाल तर सजग राहणे आवश्यक आहे. याविषयीची विशेष काळजी घ्यावी. कोणत्याही अनोळखी व्यक्तीला तुमचे पॅनकार्ड, आधार कार्ड याची झेरॉक्स, सत्यप्रत देऊ नका, त्यांना इतर सविस्तर माहिती बिलकूल देऊ नका. कोणत्याही कामासाठी कागदपत्रे देताना त्याचा उपयोग आणि त्यावर तारीख जरुर टाका.