विलीनीकरण करुन अजित पवार यांची इच्छा पूर्ण करणार?

अजित पवारांच्या अकाली एक्झिटमुळे राष्ट्रवादी काँग्रेस पक्षाच्या भवितव्याबाबत प्रश्नचिन्ह निर्माण झाले आहे. गेल्या दोन महिन्यांपासून दोन्ही राष्ट्रवादी गट एकत्र यावेत, अशी अजित पवारांची इच्छा होती आणि त्यांनी त्यासाठी बैठकाही घेतल्या होत्या. जिल्हा परिषदेच्या निवडणुकीनंतर दोन्ही गट एकत्र येण्याचा निर्णय घेणार होते, असे जयंत पाटील यांनी सांगितले.

अजित पवारांच्या निधनानंतर, प्रफुल्ल पटेल यांनी सुनेत्रा पवारांची भेट घेतली, तर शरद पवारांच्या राष्ट्रवादी काँग्रेसकडून शशिकांत शिंदे आणि जयंत पाटील यांनीही त्यांना भेट दिली. अजित पवारांच्या गटाकडे ४१ आमदार, एक लोकसभा खासदार आणि दोन राज्यसभा खासदार आहेत, तर शरद पवारांच्या गटाकडे १० आमदार आणि आठ लोकसभा खासदार आहेत. दोन्ही पक्षांचे विलीनीकरण झाल्यास, शरद पवारांची राष्ट्रवादी काँग्रेस अप्रत्यक्षपणे महायुतीत सहभागी होईल, परंतु भाजपसोबत जाण्याबाबत शरद पवारांची भूमिका अजून स्पष्ट नाही. शरद पवार स्वतः राजकारणातून निवृत्ती घेऊन विलीनीकरणाचा मार्ग मोकळा करू शकतात, अशीही एक शक्यता वर्तवली जात आहे. आता दोन्ही राष्ट्रवादी काँग्रेसचे भवितव्य कसे असेल, याबाबत पुढचे काही दिवस महत्त्वाचे ठरणार आहेत.