Asaduddin Owaisi : इन्शाअल्लाह… हिजाबमधली मुलगी एक दिवस भारताची पंतप्रधान….ओवैसी यांच्या विधानानं चर्चांना उधाण

सोलापुरातील एका प्रचारसभेत एमआयएमचे प्रमुख असदुद्दीन ओवैसी यांनी एक महत्त्वाचे विधान केले आहे. ओवैसी म्हणाले की, “हिजाब घालणारी मुलगी एक दिवस भारताची पंतप्रधान बनेल.” पाकिस्तानच्या संविधानात केवळ एकाच धर्माचा व्यक्ती पंतप्रधान किंवा राष्ट्राध्यक्ष बनू शकतो, असे नमूद करताना, बाबासाहेब आंबेडकरांच्या संविधानानुसार कोणताही भारतीय नागरिक पंतप्रधान किंवा राष्ट्राध्यक्ष होऊ शकतो, असे त्यांनी स्पष्ट केले. “आपण कदाचित नसू, पण एक हिजाब परिधान करणारी मुलगी या देशाची पंतप्रधान बनेल, इंशाअल्लाह,” असेही ते पुढे म्हणाले.

ओवैसींच्या या विधानावर भाजप नेते अनिल बोंडे यांनी तीव्र प्रतिक्रिया दिली आहे. बोंडे यांनी ओवैसींवर टीका करताना म्हटले की, “कट्टर इस्लामिक देश असलेल्या इराणमध्ये महिला हिजाब काढून टाकत आहेत. मुस्लिम महिलांनाही हिजाब नको आहे, त्यांना पारतंत्र्य नको आहे.” बोंडे यांनी ओवैसींच्या विधानाला अर्धसत्य संबोधले आणि भारतात लोकसंख्येचे प्रमाण असंतुलित होत असून मुस्लिमांची संख्या वाढत असल्याचा दावा केला. यामुळे त्यांनी सर्व हिंदूंना एकजूट होण्याचे आवाहन केले. या विधानामुळे महाराष्ट्राच्या राजकारणात नवी चर्चा सुरू झाली आहे.