अधिकारी फिरकलेच नाहीत; शेतकऱ्याचा थेट कृषिमंत्र्यांना फोन, म्हणाले…

भंडारा जिल्ह्यातील मोहाडी तालुक्यासह इतर भागांतील शेतकऱ्यांवर सध्या दुहेरी संकट कोसळले आहे. खोडकिडा, करपा आणि मावा यांसारख्या किडींच्या प्रादुर्भावामुळे भातपीक मोठ्या प्रमाणावर धोक्यात आले आहे. यामुळे शेतकऱ्यांचे मोठे आर्थिक नुकसान होत असून, अनेक पिके अक्षरशः उद्ध्वस्त होण्याच्या मार्गावर आहेत. या गंभीर परिस्थितीमध्ये स्थानिक कृषी अधिकाऱ्यांकडून दुर्लक्ष केले जात असल्याचा आरोप शेतकऱ्यांनी केला आहे. अधिकारी शेतावर येऊन पाहणी करत नाहीत, औषधांबाबत मार्गदर्शन करत नाहीत किंवा सहकार्य करत नाहीत, अशी शेतकऱ्यांची तक्रार आहे. या दिरंगाईमुळे संतप्त झालेल्या आणि हवालदिल झालेल्या एका शेतकऱ्याने थेट राज्याचे कृषिमंत्री दत्ता भरणे यांच्याशी संपर्क साधला.

फोनवर बोलताना शेतकऱ्याने कृषिमंत्र्यांना आपल्या धान पिकावरील तुडतुडा आणि मावा या किडींच्या प्रादुर्भावाची माहिती दिली. “आम्ही अनेकदा औषधे फवारूनही हा रोग आटोक्यात येत नाहीये, उलट आमचं पीक पूर्ण गळलेल्या परिस्थितीत येतंय,” असे शेतकऱ्याने सांगितले. त्याने कृषी अधिकाऱ्यांच्या निष्क्रियतेबद्दलही मंत्र्यांना सांगितले. यावर कृषिमंत्री दत्ता भरणे यांनी शेतकऱ्याला त्यांचे नाव, पत्ता आणि संबंधित कृषी अधिकाऱ्याचा नंबर टेक्स्ट मेसेजद्वारे पाठवण्यास सांगितले, जेणेकरून ते योग्य ती कारवाई करू शकतील. शेतकऱ्याला दिलासा देण्याचा प्रयत्न मंत्र्यांनी केला आहे.