भाजपकडून ठाकरेंना धक्का, पण शिंदेंना टेन्शन; मित्रपक्षांच्या मतदारसंघात BJP ची इनकमिंग

भाजपने उद्धव ठाकरे गटातील दोन महत्त्वाच्या नेत्यांना पक्षात घेतल्यामुळे एकनाथ शिंदे यांच्या नेतृत्वाखालील शिवसेनेमध्ये अस्वस्थता निर्माण झाली आहे. नाशिकच्या मालेगावमधून अद्वय हिरे आणि छत्रपती संभाजीनगरमधून राजू शिंदे यांनी भाजपमध्ये प्रवेश केला. या दोन्ही नेत्यांनी २०२० च्या विधानसभा निवडणुकीत शिंदे गटाच्या अनुक्रमे दादा भुसे आणि संजय शिरसाट यांच्या विरोधात निवडणूक लढवली होती.

भाजपच्या या कृतीमुळे महायुतीतील मित्रपक्षांमध्ये नाराजी पसरली आहे. शिंदे गटाचे नेते शहाजीबापू पाटील यांनी भाजपच्या भूमिकेवर तीव्र शब्दांत नाराजी व्यक्त केली, ज्यामुळे राजकीय वर्तुळात चर्चा सुरू झाली आहे.

भाजपकडून २०२९ च्या विधानसभा निवडणुकीची तयारी आतापासूनच सुरू झाल्याचे या पक्षप्रवेशांमुळे स्पष्ट होत आहे. अद्वय हिरे यांच्यावर नाशिक जिल्हा बँकेकडून घेतलेले कर्ज थकवल्याचा आणि आर्थिक फसवणुकीचा आरोप असून, ते नऊ महिने तुरुंगात होते. त्यांना नुकताच जामीन मिळाला आहे.