आंतरजातीय विवाह केल्याने गावाने घातला बहिष्कार! दाम्पत्याचा आरोप

चंद्रपूर जिल्ह्यातील सिंदेवाही तालुक्यातील सरडपार गावामध्ये एका आंतरजातीय विवाह केलेल्या दांपत्याला सामाजिक बहिष्काराचा सामना करावा लागत आहे. या बहिष्काराच्या परिणामी, हे दांपत्य दीड ते दोन वर्षांपासून अंधारात राहत आहे आणि त्यांना उपासमारीची वेळ आली आहे. त्यांच्या कुटुंबातील सदस्यांनी आंतरजातीय विवाहाला विरोध करत गावकरी आणि नातेवाईकांसोबत मिळून त्यांच्याशी सर्व सामाजिक संबंध तोडले आहेत.

या दाम्पत्याच्या म्हणण्यानुसार, त्यांना कोणताही कामधंदा करू दिला जात नाही आणि गावात कोणीही त्यांच्याशी बोलत नाही. एमएससी बायोटेक शिक्षण घेतलेल्या पतीने पूर्वी चंद्रपूरमध्ये सचिन अकॅडमी नावाने संस्था चालवली होती, जिथे त्यांना चांगली मिळकत होती. मात्र, आता त्यांना आर्थिक अडचणींना सामोरे जावे लागत आहे. एका वर्षाच्या त्यांच्या मुलालाही यामुळे त्रास होत आहे. आशा सेविकांकडून लसीकरण आणि औषधे मिळण्यासही अडथळे येत आहेत. या संदर्भात त्यांनी सिंदेवाही पोलीस ठाण्यात अनेक वेळा तक्रार केली, तसेच एसपी आणि मंत्री सुधीर मुनगंटीवार यांच्याकडेही दाद मागितली, परंतु अद्याप कोणतीही ठोस कारवाई झालेली नाही.