Local Body Elections : राज ठाकरे अन् उद्धव ठाकरेंच्या युतीची घोषणा अन् मनसेला पहिला धक्का, शिंदेंच्या सेनेत….

पालिका निवडणुकीच्या पार्श्वभूमीवर महाराष्ट्राच्या राजकारणात एक महत्त्वाची घडामोड समोर आली आहे. मनसेला मोठा धक्का देत छत्रपती संभाजीनगरचे मनसे जिल्हाप्रमुख सुमित खांबेकर यांनी शिवसेनेत (शिंदे गट) प्रवेश केला आहे. हा पक्षप्रवेश उपमुख्यमंत्री एकनाथ शिंदे यांच्या उपस्थितीत पार पडला. आगामी स्थानिक स्वराज्य संस्थांच्या निवडणुकांपूर्वी मनसेसाठी हा एक मोठा राजकीय धक्का मानला जात आहे. सुमित खांबेकर यांच्यासोबतच मराठवाड्यातील मनसेचे चार जिल्हाध्यक्षही शिंदे गटात सामील झाले आहेत.

या पक्षप्रवेशावेळी उपमुख्यमंत्री एकनाथ शिंदे यांनी नव्याने आलेल्या सर्व पदाधिकाऱ्यांचे स्वागत केले. केवळ मनसेतूनच नव्हे, तर कोल्हापूर आणि नाशिकमधील ठाकरे सेनेच्या काही पदाधिकाऱ्यांनीही एकनाथ शिंदे यांच्या उपस्थितीत शिवसेनेत प्रवेश केल्याची माहिती आहे. या राजकीय घडामोडींमुळे महाराष्ट्रातील राजकीय वर्तुळात चर्चांना उधाण आले असून, आगामी स्थानिक स्वराज्य संस्थांच्या निवडणुकांमध्ये याचे परिणाम दिसण्याची शक्यता आहे.