नाशिक : “एकनाथ शिंदे आपण मुख्यमंत्री आहात. संधी मिळालेली आहे. काम करताय. आमची संधी घालवली हे खरंय. पण गडी मेहनती आहे हे विसरुन जाता येत नाही. जो काही वेळ मिळाला आहे, जी संधी मिळाली आहे ती त्या संधीत जास्तीत जास्त लोकांपर्यंत काम करण्याचा प्रयत्न आपण करत आहात ते आम्ही मनापासून पाहतोय ते नाकारता येत नाही”, असे म्हणत काँग्रेस नेते बाळासाहेब थोरात यांनी एकनाथ शिंदे यांच्यावर कौतुकाची स्तुतीसुमनं उधळली आहेत. नाशिकच्या सिन्नर तालुक्यातील नांदुर शिंगोटे येथे गोपीनाथ मुंडे यांच्या स्मारकाचे आणि पूर्णाकृती पुतळ्याचा लोकार्पण सोहळा आज पार पडला. या कार्यक्रमात बाळासाहेब थोरात बोलत होते. दरम्यान, यावेळी त्यांनी मुख्यमंत्री एकनाथ शिंदे यांच्यासमोर भर मंचावर आपल्या मनातील सल देखील व्यक्त करुन दाखवली.