National Herald Case : सोनिया गांधींसह राहुल गांधींना दिलासा, ईडी आरोपपत्राची दखल घेण्यास कोर्टाचा नकार
नॅशनल हेराल्ड प्रकरणात सोनिया गांधी आणि राहुल गांधींसह इतरांना मोठा दिलासा मिळाला आहे. राऊस अव्हेन्यू न्यायालयाने ईडीने दाखल केलेल्या आरोपपत्राची दखल घेण्यास नकार दिला. विशेष न्यायाधीश विशाल गोगणे यांच्या या भूमिकेमुळे गांधी कुटुंबाला हे प्रकरण तात्पुरते का होईना, सुटकेचा निःश्वास घेता आला आहे. मनी लॉन्ड्रिंगच्या आरोपावरून हे प्रकरण 2012 पासून सुरू आहे.
नॅशनल हेराल्ड प्रकरणात काँग्रेसच्या नेत्या सोनिया गांधी आणि राहुल गांधी यांना दिल्लीच्या राऊस अव्हेन्यू न्यायालयातून मोठा दिलासा मिळाला आहे. विशेष न्यायाधीश विशाल गोगणे यांनी अंमलबजावणी संचालनालय (ईडी) ने या प्रकरणात दाखल केलेल्या आरोपपत्राची दखल घेण्यास स्पष्टपणे नकार दिला आहे. या निर्णयामुळे गांधी कुटुंब आणि या प्रकरणातील इतर आरोपींना एक महत्त्वपूर्ण तात्पुरता दिलासा मिळाला आहे. प्रकरणाचा तपास कायमस्वरूपी सुरू ठेवण्याचा अधिकार ईडीला आहे, असे न्यायाधीश गोगणे यांनी नमूद केले. मात्र, सध्या दाखल केलेल्या आरोपपत्राच्या आधारे कोणतीही कारवाई करण्यास न्यायालयाने नकार दिला आहे. याचा अर्थ, न्यायालय सध्या तरी ईडीच्या आरोपांना स्वीकारत नाही. नॅशनल हेराल्ड हे वृत्तपत्र गांधी कुटुंबाच्या मालकीचे होते, असा आरोप आहे. भाजप नेते सुब्रमण्यम स्वामी यांनी 2012 साली या प्रकरणात मनी लॉन्ड्रिंग आणि मोठ्या प्रमाणावर आर्थिक गडबड झाल्याचा आरोप केला होता. या आरोपानंतरच ईडीने या प्रकरणाचा तपास सुरू केला होता आणि अनेक वर्षांपासून यावर कारवाई सुरू होती. सोनिया गांधी आणि राहुल गांधी यांच्यावर गंभीर स्वरूपाचे आरोप ठेवण्यात आले होते.
