Ajay Munde : खोक्याचा आका धसच; खोक्या भाईसह धसांनाही सहआरोपी करा, अजय मुंडेंची मागणी

आमच्यामध्ये कुठलाही कौटुंबिक कलह नाही. फक्त सनसनाटी निर्माण करण्यासाठी असे आरोप केले जात आहेत, असं धनंजय मुंडे यांचे चुलत बंधू अजय मुंडे यांनी आज पत्रकार परिषदेत बोलताना म्हंटलं आहे. भाजप आमदार सुरेश धस यांनी आमच्या धनंजय मुंडेंच्या आईबाबत केलेले आरोप बिनबुडाचे आणि निराधार आहेत. मुंडे कुटुंबीयांमध्ये आम्ही कोणीही धनंजय मुंडे यांच्या नाराज नाहीत. आम्ही सर्व कुटुंबीय भक्कमपणे धनंजय मुंडेंच्या पाठीशी आहोत, असंही अजय मुंडे यांनी यावेळी सांगितलं आहे.

आमदार सुरेश धस यांच्यावर गंभीर आरोप देखील यावेळी मुंडे यांनी केले आहेत. पुढे बोलताना अजय मुंडे म्हणाले की, धस किती धुतल्या तांदळाचा आहेत हे दिसत आहे. त्यांचा खोक्या आज बाहेर पडलेला आहे. खोक्याचा आका कोण ? सुरेश धस म्हणतात की, तो साधा कार्यकर्ता आहे. असा साधा कार्यकर्ता दोनशे हरणं, मोरं कापून खातो.मग याच्या मागे सुरेश धस नसतील, हे कशावरून सांगता येईल. या खोक्याच्या मागे सुरेश धस 100 टक्के आहेत. या प्रकरणात त्यांनाही सहआरोपी केले पाहिजे, अशी मागणी अजय मुंडे यांनी केली आहे.