मी जिल्ह्यात अनेकांना त्रास दिला हे खरं, पण…; एकनाथ खडसेंचा मोठा खुलासा

माजी मंत्री एकनाथ खडसे यांनी पालकमंत्री गुलाबराव पाटील यांच्या टीकेला प्रत्युत्तर दिले आहे. गुलाबराव पाटील यांनी म्हटले होते की, खडसे यांनी अनेकांना त्रास दिला आणि त्यांना तुरुंगात टाकले, त्यामुळे त्यांच्यावर सध्याची वेळ आली आहे. यावर प्रतिक्रिया देताना खडसे यांनी आपली भूमिका स्पष्ट केली. त्यांनी म्हटले, “मी त्रास दिला ही गोष्ट खरी आहे, मात्र तो केवळ गुंड प्रवृत्तीचे आणि भ्रष्ट प्रवृत्तीचे लोक, जे जिल्ह्यासह जिल्ह्याबाहेरही सक्रिय आहेत, त्यांना दिला.” अशा लोकांना कारागृहात पाठवण्यासाठी केलेल्या प्रयत्नांमध्ये आपल्याला यश मिळाल्याचे खडसे यांनी नमूद केले. ते म्हणाले, जे भ्रष्टाचारी आहेत त्यांच्याविरुद्ध मी विधानसभेत नेहमीच आवाज उठवला आहे.

खडसे यांनी गुलाबराव पाटील यांना त्यांच्या राजकीय वाटचालीतील मदतीची आठवण करून दिली. आपण पालकमंत्री असताना पाटील हे जिल्हा परिषदेचे शिक्षण सभापती होते आणि त्यांना खूप मदत केली होती. तसेच, आमदारकीच्या वेळीही आपली मदत त्यांना सहाय्यभूत ठरल्याचे खडसे यांनी सांगितले. खडसे यांनी गुलाबराव पाटील यांना आत्मचिंतन करण्याचा सल्ला दिला, कारण पालकमंत्री आणि मंत्री असतानाही ते स्वतःच्या नगरपालिकेचा विकास करू शकले नाहीत. त्यांनी मुक्ताईनगरमधील गुंड प्रवृत्ती आणि भ्रष्टाचारी लोकांना त्रास दिला आहे आणि यापुढेही देणार असल्याचे स्पष्ट केले.