57 मधले 17 नगरसेवक पळून गेले! एकनाथ खडसेंची विरोधकांवर टीका

जळगाव महानगरपालिका निवडणुकांच्या तोंडावर ज्येष्ठ नेते एकनाथ खडसे यांनी महायुती आणि भाजपवर कडाडून टीका केली आहे. विशेषतः उमेदवारी वाटपावरून त्यांनी अनेक प्रश्न उपस्थित केले. खडसे यांच्या मते, मागील निवडणुकीत भाजपने ५७ नगरसेवक निवडून आणले होते, परंतु त्यापैकी १७ नगरसेवक त्यांना सांभाळता आले नाहीत आणि ते शिवसेनेकडे पळून गेले. नंतर भाजपनेच परत त्यांना आपल्या पक्षात घेतले. ही परिस्थिती शहरातील राजकारणाचे गढूळ स्वरूप दर्शवते, असे त्यांनी म्हटले.

खडसे यांनी महायुतीच्या अनेक उमेदवारांवर गुन्हेगारी पार्श्वभूमी असल्याचा आरोप केला. यापूर्वी सुशिक्षित आणि संस्कारी उमेदवार असायचे, पण आता पाईप चोर, खंडणीखोर आणि खुनाच्या गुन्ह्यातील उमेदवारांना तिकीट दिल्याचे त्यांनी म्हटले. जळगाव शहरात दिल्ली आणि महाराष्ट्रात सत्ता असूनही विकास का झाला नाही, असा सवालही त्यांनी विचारला. स्थानिक स्वराज्य संस्थांच्या निवडणुका महत्त्वाच्या असून, मतदारांनी योग्य उमेदवारांची निवड करावी, असे आवाहन खडसे यांनी केले.