Mahayuti : Eknath Shinde : महायुतीत पुन्हा नाराजीचा सूर? मुख्यमंत्री फडणवीसांच्या बैठकीला शिंदेंची अनुपस्थिती, नेमकं कारण काय?
उपमुख्यमंत्री एकनाथ शिंदे नाराज असल्याची सूत्रांची माहिती आहे. फडणवीसांच्या उपस्थितीत झालेल्या बायोगॅस बैठकीला ते गैरहजर राहिले. दुष्काळ आढावा बैठकीला न बोलावणे आणि शिक्षक मतदारसंघातील निवडणूक प्रकरणामुळे नाराजीच्या चर्चांना उधाण आले आहे. बच्चू कडू यांनी ‘स्फोट होईल’ असे म्हटले, तर दरेकर यांनी ते कामात व्यस्त असतील असे स्पष्टीकरण दिले.
राज्याचे उपमुख्यमंत्री एकनाथ शिंदे नाराज असल्याची सूत्रांकडून माहिती मिळत आहे. आज देवेंद्र फडणवीस यांच्या उपस्थितीत पार पडलेल्या एका महत्त्वाच्या बैठकीला एकनाथ शिंदे अनुपस्थित राहिले. यामुळे राजकीय वर्तुळात त्यांच्या नाराजीच्या चर्चांना नव्याने उधाण आले आहे.
आज सकाळी 11 वाजता वर्षा निवासस्थानी कचऱ्यापासून तयार होणाऱ्या कॉम्प्रेस्ड बायोगॅस संदर्भात एक बैठक बोलावण्यात आली होती. मात्र या बैठकीला उपमुख्यमंत्री शिंदेंनी दांडी मारली. विशेष म्हणजे, याचवेळी त्यांनी वर्षा बंगल्यापासून जवळच असलेल्या नंदनवन बंगल्यावर अर्ध्या तासाहून अधिक काळ पत्रकार परिषद घेतली.
शिंदे यांच्या नाराजीमागे काही प्रमुख कारणे सांगितली जात आहेत. केंद्रीय पथकासोबतच्या दुष्काळ आढावा बैठकीला त्यांना न बोलावल्याने ते नाराज असल्याची चर्चा आहे. तसेच, पुणे शिक्षक मतदारसंघात शिवसेनेच्या उमेदवाराला माघार घ्यावी लागल्याने आणि अमरावती शिक्षक मतदारसंघात भाजपच्या बंडखोरांनी माघार न घेतल्यानेही ते दुखावले असल्याचे बोलले जाते. या सर्व घडामोडींमुळे शिंदे यांच्या राजकीय भूमिकेकडे आता सर्वांचे लक्ष लागले आहे.
