Manoj Jarange Patil : भुरटं, अलिबाबा… भुजबळांना डिवचलं अन् अजितदादा थोडा विचित्र, बोलता बोलता घोडा… जरांगे नेमकं काय म्हणाले?

मनोज जरांगे पाटील यांनी बीड येथील ओबीसी एल्गार मेळाव्याला एका विशिष्ट जातीचा किंवा टोळीचा मोर्चा असे संबोधले. त्यांनी मेळाव्याचे मुख्य नेते छगन भुजबळ यांच्यावर गंभीर आरोप केले. भुजबळ ओबीसी आरक्षणाचा केवळ ढोंग करत असून, ब्लॅकमेलिंग करून मंत्रिपदे मिळवण्याचा प्रयत्न करत असल्याचा दावा जरांगे पाटलांनी केला. त्यांचा उद्देश ओबीसी समाजाचे कल्याण नसून, मराठा-ओबीसी समाजात तणाव निर्माण करून स्वतःच्या राजकीय महत्त्वाकांक्षा पूर्ण करणे असल्याचे पाटील म्हणाले.

या मेळाव्याला पंकजा मुंडे यांची अनुपस्थिती जरांगे पाटलांनी सकारात्मक मानली. मराठा समाजाला राजकीय पाठिंबा देणाऱ्यांनी त्यांच्या भविष्याच्या आड येऊ नये, असे मत त्यांनी व्यक्त केले. छगन भुजबळ यांनी धनंजय मुंडे यांना गोपीनाथ मुंडे यांचा वारसा चालवण्याचे आवाहन करण्यावरही त्यांनी टीका केली. भ्रष्ट आणि जेलवारी केलेल्या नेत्यांच्या हाती चांगला वारसा देऊ नये, असे जरांगे पाटील यांनी स्पष्ट केले. मराठा आरक्षणासाठी ५८ लाख नोंदी झाल्या असून, अधिकाऱ्यांनी यात अडथळे आणल्यास गंभीर परिणाम होतील, असा इशाराही त्यांनी दिला.