Maharashtra Elections : लक्ष्मी ते नवरा बायको मच्छरदाणीत झोपा… 4 नेते अन् 4 वक्तव्य… प्रचार जोमात पण नेते हे काय बोलून गेले!

महाराष्ट्रामध्ये सध्या नगरपरिषद आणि नगरपंचायतीच्या निवडणुकांचा प्रचार मोठ्या उत्साहात सुरू आहे. अनेक ठिकाणी राजकीय नेत्यांच्या प्रचारसभा सुरू असून, या सभांमधील काही वक्तव्यांनी राजकीय वर्तुळात चांगलीच चर्चा घडवून आणली आहे. गुलाबराव पाटील यांनी आपल्या एका भाषणात लक्ष्मीच्या आगमनाबाबत केलेल्या वक्तव्यावरून वाद निर्माण झाला. यावर स्पष्टीकरण देताना त्यांनी लक्ष्मी म्हणजे फक्त नोटा नसून, ती मायबहीण देखील असते असे म्हटले. टीव्ही वाहिन्यांनी त्यांच्या विधानाचे चुकीचे अर्थ काढल्याचा आरोपही त्यांनी केला.

तर गिरीश महाजनांनी विकासकामांचा संदर्भ देत, नगरविकास खाते आपल्याकडे असून, नशिराबादची नगरपालिका आताच झाल्याचे सांगितले. सरकारने कामगारांना ग्लोज, गमबूट आणि मच्छरदाणीसारख्या वस्तू पुरवून त्यांची किती काळजी घेतली आहे, हे त्यांनी अधोरेखित केले आणि विचारले की, “इतकं काळजी घेणारं सरकार, आणखी काय पाहिजे?”

याचबरोबर, आशिष देशमुखांनी आपल्या भाषणात कळमेश्वर-सावनेर भागातील लोकांना उद्देशून, हे देवेंद्र फडणवीस साहेबांचे सरकार आहे आणि मुख्यमंत्री व गृहमंत्री नागपुरातले असल्याने जास्त वळवळ केल्यास गंभीर परिणाम होतील, असा इशारा दिला. कळमेश्वरची संस्कृती बिघडवण्याचे काम काँग्रेसने करू नये, असेही ते म्हणाले.