Manoj Jarange | जरांगेंच्या उपोषणाचा 14 वा दिवस; तोडगा निघणार?

मराठा आरक्षणाच्या मागणीसाठी मनोज जरांगे पाटील यांनी सुरू केलेल्या आमरण उपोषणाचा आज चौदावा दिवस आहे. अंतरवाली सराटी येथे सुरू असलेल्या या उपोषणात त्यांची प्रकृती चिंताजनक बनली आहे. मध्यरात्री वैद्यकीय पथकाने तपासणी केली असता, प्रकृती खालावल्याचे समोर आले. त्यांना तातडीने सलाईन लावून उपचार सुरू करण्यात आले असून, पहाटेपर्यंत त्यांच्यावर उपचार सुरू होते.

जरांगे पाटलांच्या तब्येतीवर वैद्यकीय पथक आता २४ तास लक्ष ठेवून आहे. प्रकृती खालावल्याची कल्पना त्यांना देण्यात आली आहे. गेल्या चार दिवसांपासून जरांगे पाटलांची शिष्टमंडळासोबत कोणतीही चर्चा झालेली नाही. सरकार तोडगा काढण्यासाठी प्रयत्न करत आहे का, याकडे आता सर्वांचे लक्ष लागले आहे. याच पार्श्वभूमीवर आज दुपारी १२ वाजता अंतरवाली सराटी येथे एक महत्त्वाची बैठक होणार आहे. उद्याच्या राज्यव्यापी बैठकीकडेही सर्वांचे लक्ष लागून राहिले आहे.