माझा मुंबईत जाऊनच जीव निघालाा तर… आंदोलनाविषयी मनोज जरांगे पाटलांची मोठी प्रतिक्रिया!

मराठा आरक्षणासाठी मुंबईकडे निघालेले मनोज जरांगे पाटील यांची तब्येत खालावली आहे. डॉक्टरांनी त्यांना आयसीयूमध्ये तातडीने उपचार घेण्याचा सल्ला दिला आहे. जरांगे पाटलांचा रक्तदाब (बीपी) आणि रक्तातील साखर (शुगर) कमी झाली आहे. सध्या ते बीड जिल्ह्यातील पाटोदा येथे असून, त्यांना सलाईन लावण्यात आले आहे. आरोग्याची स्थिती गंभीर असूनही, जरांगे पाटलांनी आपला मुंबईच्या दिशेने जाण्याचा निर्धार कायम ठेवला आहे.

पाटोद्याहून थेट मुंबईला जाणार असल्याचे त्यांनी स्पष्ट केले आहे. दरम्यान, जरांगे पाटलांच्या कथित शिवराळ भाषेवरून राजकीय वर्तुळात नाराजी व्यक्त होत आहे. महायुतीमधील आमदार आणि खासदारांनी मंत्रिमंडळाच्या बैठकीत यावर आक्षेप घेतल्याची माहिती आहे. मुख्यमंत्री आणि उपमुख्यमंत्र्यांविरोधात वापरलेले अपशब्द योग्य नसल्याचे त्यांचे म्हणणे आहे. दुसरीकडे, जरांगे पाटलांच्या प्रस्तावित आंदोलनासाठी परवानगी देऊ नये, अशी याचिका इनी फाउंडेशनने मुंबई उच्च न्यायालयात दाखल केली आहे. यामुळे मराठा आरक्षणाचा मुद्दा आणि जरांगे पाटलांचे आंदोलन दोन्ही बाजूने आव्हानांना सामोरे जात आहे.