Jarange Patil Viral Audio Clip : मनोज जरांगेंना 500 कोटी मिळाल्याची कथित ऑडिओ क्लिप व्हायरल; श्रीकांत शिंदेंचंही नाव, जरांगे काय खुलासा करणार?

मनोज जरांगे पाटील यांच्या संदर्भात ५०० कोटी रुपयांच्या कथित ऑडिओ क्लिपमुळे महाराष्ट्राच्या राजकारणात सध्या चर्चा सुरू आहे. ही क्लिप मोठ्या प्रमाणात व्हायरल झाली आहे. या क्लिपमध्ये मनोज जरांगे पाटील यांना ५०० कोटी रुपये मिळाल्याचा उल्लेख आहे, तसेच हे पैसे श्रीकांत शिंदे यांच्याकडून मिळाल्याचेही नमूद केले आहे. या ऑडिओ क्लिपमध्ये जरांगे पाटील विधानसभा निवडणुकीत आमच्या फायद्याचे ठरतील की नाही, यावर चर्चा असल्याचे ऐकू येते.

टीव्ही ९ मराठी मात्र या व्हायरल ऑडिओ क्लिपच्या सत्यतेची किंवा तिच्यातील माहितीची पुष्टी करत नाही. या आरोपांनंतर मनोज जरांगे पाटील लवकरच पत्रकार परिषद घेणार असून, या पत्रकार परिषदेत ते ५०० कोटींच्या आरोपांवर सविस्तर खुलासा करतील अशी अपेक्षा आहे. ते पत्रकार परिषदेमध्ये सर्व पुरावे सादर करणार असल्याचेही बोलले जात आहे. त्यामुळे या पत्रकार परिषदेकडे सर्वांचे लक्ष लागले आहे.