Manoj Jarange Patil : ‘त्या’ OBC नेत्याचं राजकीय करिअर उद्ध्वस्त करायचं… मनोज जरांगे पाटलांचा थेट इशारा

मनोज जरांगे पाटील यांनी नुकत्याच काढण्यात आलेल्या मराठा आरक्षण जीआरला उच्च न्यायालयाने स्थगिती देण्यास नकार दिल्याबद्दल समाधान व्यक्त केले आहे. त्यांनी न्यायव्यवस्थेवर पूर्ण विश्वास दर्शवला. मराठवाड्यातील मराठा समाजाला आरक्षण मिळेल, असा विश्वास त्यांनी व्यक्त केला. जरांगे पाटील यांनी स्पष्ट केले की, २ तारखेला काढण्यात आलेला जीआर हा हैदराबाद गॅझेट, महसुली पुरावे आणि सरकारी दस्तावेजांवर आधारित असल्याने तो अत्यंत मजबूत आहे. या जीआरला काहीही होऊ शकत नाही, असे ते म्हणाले.

याउलट, यापूर्वीच्या अनेक आरक्षणांसाठी काढलेले जीआर हे केवळ एका ओळीचे होते, असे त्यांनी नमूद केले. यावेळी, जरांगे पाटील यांनी मराठा आरक्षणाला विरोध करणाऱ्या ओबीसी नेत्यांवर तीव्र शब्दांत टीका केली. छगन भुजबळ आणि त्यांच्यासोबतच्या ७०-८० नेत्यांची नियत चांगली नाही. ते राजकीय स्वार्थासाठी ओबीसी समाजाचा वापर करत आहेत. अशा विरोधात गेलेल्या ओबीसी नेत्यांचे राजकीय भविष्य उद्ध्वस्त करण्याचा इशारा त्यांनी दिला.