…तर 10 मिनिटांत महाराष्ट्र बंद पाडला पाहिजे! जरांगेंचा सरकारला कडक इशारा

मराठा आरक्षण आंदोलनाचे नेते मनोज जरांगे पाटील यांनी मराठा आरक्षणाच्या मागणीसंदर्भात सरकारवर गंभीर आरोप केले आहेत. सरकार जाणूनबुजून हलगर्जीपणा करत असून मराठा समाजाची फसवणूक करत असल्याचा त्यांचा दावा आहे. सरकारने मागील अनेक महिन्यांपासून दिलेल्या आश्वासनांची पूर्तता केली नसल्याचे त्यांनी म्हटले आहे.

जरांगे पाटील यांनी मराठा समाजाला १२ सप्टेंबर रोजी अंतरवाली सराटी येथे महत्त्वपूर्ण बैठकीसाठी उपस्थित राहण्याचे आवाहन केले आहे. ही बैठक मुंबईतील पुढील आंदोलनाची दिशा ठरवण्यासाठी आयोजित करण्यात आली आहे.

यासोबतच, त्यांनी सरकारला कडक इशारा दिला आहे. मुंबईकडे जाणाऱ्या मराठा आंदोलकांना जर पोलिसांनी अडवण्याचा किंवा त्यांच्यावर हल्ला करण्याचा प्रयत्न केला आणि त्यात कोणत्याही आंदोलकाला किरकोळ दुखापत झाली, तर अवघ्या दहा मिनिटांत संपूर्ण महाराष्ट्र बंद पाडण्याचे आवाहन त्यांनी केले आहे. हे आंदोलन शांततेत सुरू राहील, मात्र कोणत्याही हल्ल्यास तीव्र प्रतिसाद दिला जाईल, असे जरांगे पाटील यांनी स्पष्ट केले आहे.