Manoj Jarange Viral Audio Clip : जरांगे पाटलांच्या ऑडिओ क्लिपमध्ये संजय राऊत अन् सुषमा अंधारेंची नावं? महाराष्ट्राच्या राजकारणात खळबळ

महाराष्ट्राच्या राजकारणात सध्या एका व्हायरल ऑडिओ क्लिपमुळे खळबळ उडाली आहे. या क्लिपमध्ये मराठा आरक्षणाचे नेते मनोज जरांगे पाटील यांच्याशी संबंधित विविध राजकीय डावपेचांवर चर्चा ऐकायला मिळते. क्लिपमध्ये असा दावा करण्यात आला आहे की, जरांगे पाटील यांना श्रीकांत शिंदे यांच्याकडून ५०० कोटी रुपये मिळाले आहेत. ही रक्कम त्यांना विधानसभा निवडणुकीत वापरण्यासाठी दिली गेल्याचे यात सूचित केले आहे.

या चर्चेत जरांगे पाटील यांना वैयक्तिकरित्या देवेंद्र फडणवीस आणि भाजपला लक्ष्य करण्यासाठी कसे वापरता येईल, यावर भर दिला गेला आहे. ते ‘थर्ड फ्रंट’ म्हणून उपयुक्त ठरू शकतात, असेही यात म्हटले आहे. भाजपला ‘मराठा द्रोही’ म्हणून घोषित करण्याची आणि मराठा तसेच ओबीसी समुदायाला एकत्र आणण्याची रणनीतीही यात मांडली आहे. या क्लिपमध्ये संजय राऊत आणि सुषमा अंधारे यांच्या उल्लेखाने राजकीय वर्तुळात अनेक तर्कवितर्क लावले जात आहेत. केवळ मराठा आरक्षणापुरते मर्यादित न राहता शेती कर्जमाफी आणि इतर सामाजिक मुद्द्यांना हात घालण्याचे आवाहनही या क्लिपमध्ये ऐकू येते.