BMC Election Updates : महापालिकेचा रणसंग्राम! मुंबईत एकट्या भाजपची 50 जागांवर आघाडी

मुंबई महानगरपालिका निवडणुकीचे कल समोर येत असताना भाजपने मुंबईत ५० जागांचा आकडा गाठला आहे. एकूण २२७ पैकी १२८ जागांचे कल आतापर्यंत हाती आले आहेत. एकट्या भाजपने मुंबईत ५० जागांवर आघाडी घेत आपला दबदबा निर्माण केला आहे, जो महानगरपालिकेतील सर्वात मोठा पक्ष म्हणून उदयास येत आहे.

पुणे महानगरपालिकेच्या निकालांवर नजर टाकल्यास, भाजप ३९ जागांवर आघाडीवर आहे, तर शिवसेना चार, मनसे शून्य, ठाकरे गट एक आणि काँग्रेस एक जागेवर आघाडीवर आहे. राज्यभरात शिंदे गट ६८ जागांवर, तर ठाकरे गट ४२ जागांवर आघाडीवर असल्याचे चित्र आहे.

दरम्यान, वसई-विरार महानगरपालिकेतून एक मोठी बातमी समोर आली आहे. हितेंद्र ठाकूर यांच्या बहुजन विकास आघाडीने सर्व ११५ जागांवर आघाडी घेत एकतर्फी विजय मिळवला आहे. २०१५ मध्ये या आघाडीला १०८ जागा मिळाल्या होत्या. तीन आमदार पराभूत होऊनही ठाकूर यांची पकड स्थानिक राजकारणावर कायम असल्याचे या निकालातून स्पष्ट झाले आहे.