Ritu Tawade | मुंबईचा राष्ट्रीय स्तरावर डंका; अखिल भारतीय महापौर परिषदेच्या अध्यक्षपदी रितू तावडेंची वर्णी

मुंबईच्या महापौर रितू तावडे यांची अखिल भारतीय महापौर परिषदेच्या उपाध्यक्षपदी निवड करण्यात आली आहे. या निवडीमुळे मुंबईला राष्ट्रीय स्तरावरील महापौर संघटनेत महत्त्वाचे प्रतिनिधित्व मिळाले आहे.

उत्तराखंडमधील ऋषिकेश येथे आयोजित करण्यात आलेल्या अखिल भारतीय महापौर परिषदेच्या 117 व्या कार्यकारी समितीच्या बैठकीत रितू तावडे अधिकृतपणे उपाध्यक्षपदाचा कार्यभार स्वीकारणार आहेत. देशभरातील विविध शहरांतील सुमारे 240 महापौरांचा समावेश असलेल्या या प्रतिष्ठित संघटनेत मुंबईला मानाचे स्थान प्राप्त झाले असल्याचे मानले जात आहे.

रितू तावडे यांच्या निवडीमुळे मुंबई महापालिकेच्या कामकाजाला राष्ट्रीय स्तरावर अधिक प्रभावी प्रतिनिधित्व मिळण्याची अपेक्षा व्यक्त केली जात आहे. तसेच शहरी विकास, नागरी सुविधा आणि स्थानिक स्वराज्य संस्थांच्या प्रश्नांवर मुंबईचा आवाज देशपातळीवर अधिक ठळकपणे मांडला जाणार असल्याचे सांगितले जात आहे.

दरम्यान, रितू तावडे यांच्या या निवडीबद्दल विविध राजकीय, सामाजिक आणि प्रशासकीय स्तरातून त्यांचे अभिनंदन करण्यात येत आहे.