Nashik Election : नागपूरनंतर नाशकात हायव्होल्टेज ड्रामा, बंडखोर उमेदवाराला कार्यकर्त्यांनी घरात कोंडलं अन्…

नागपूरनंतर आता नाशिकमध्ये एका उच्च पातळीच्या राजकीय नाट्यमय घटनेची नोंद झाली आहे. नाशिकच्या मखमलाबादमधील प्रभाग क्रमांक सहामध्ये भाजपच्या बंडखोर उमेदवार ज्ञानेश्वर काकड यांना त्यांच्याच निष्ठावंत कार्यकर्त्यांनी घरात कोंडून ठेवले. अपक्ष उमेदवारी अर्ज दाखल केल्यानंतर, तो अर्ज मागे घेऊ नये म्हणून कार्यकर्त्यांनी त्यांच्या घराला साखळी कुलूप लावले. ज्ञानेश्वर काकड तुम आगे बढो, हम तुम्हारे साथ है अशा घोषणा देत कार्यकर्त्यांनी पक्ष नेतृत्वावर निष्ठावंतांना डावलल्याचा आरोप केला. ज्ञानेश्वर काकड यांनीही आपला उमेदवारी अर्ज मागे घेण्यास स्पष्टपणे नकार दिला आहे. या प्रभागात बाळू काकड यांना भाजपने उमेदवारी दिली होती, तर ज्ञानेश्वर काकड हे देखील इच्छुक उमेदवार होते. तिकीट न मिळाल्याने त्यांनी अपक्ष म्हणून अर्ज भरला. आज ते अर्ज मागे घेण्यासाठी जात असताना कार्यकर्त्यांनी त्यांना थांबवले. नाशिकमध्ये भाजपच्या निष्ठावंत कार्यकर्त्यांना डावलून तिकीटवाटप केल्याबद्दलचा रोष या घटनेतून समोर आला आहे.