NCP Unity : विधानसभेत एकमेकांच्या विरोधात, महापालिका निवडणुकीत राष्ट्रवादीचे दोन्ही गट एकत्र येणार?

विधानसभा आणि लोकसभा निवडणुकीत एकमेकांविरोधात उभ्या ठाकलेल्या राष्ट्रवादी काँग्रेसच्या दोन्ही गटांमध्ये पिंपरी-चिंचवड महापालिका निवडणुकीसाठी नवीन समीकरण तयार होण्याची शक्यता दिसत आहे. अजित पवारांच्या राष्ट्रवादी गटाचे नेते नाना काटे यांनी दावा केला आहे की, मतांची विभागणी टाळण्यासाठी सुप्रिया सुळे यांनी त्यांना एकत्र लढण्याबाबत फोन केला होता. यावर, राष्ट्रवादी काँग्रेस पार्टी शरदचंद्र पवार पक्षासाठी भारतीय जनता पक्ष हा एक नंबरचा राजकीय शत्रू असल्याने, मतविभाजन टाळण्यासाठी इतर समविचारी पक्षांशी चर्चा करायला हरकत नाही, असे या गटाचे कार्यकर्ते मानतात.

अजित पवारांच्या गटाचे प्रदेशाध्यक्ष सुनील तटकरे यांनी सांगितले की, पिंपरी-चिंचवडमध्ये दोन्ही राष्ट्रवादीने एकत्र लढावे की नाही, यावर ते अजित पवारांसोबत चर्चा करणार आहेत. स्थानिक नेत्यांना अधिकार दिले असून तेच निर्णय घेतील, असे अजित पवारांनी स्पष्ट केले आहे. मात्र, दुसरीकडे उपमुख्यमंत्री एकनाथ शिंदे यांनी पुणे आणि पिंपरी-चिंचवडमध्ये भाजप आणि अजित पवारांची राष्ट्रवादी स्वतंत्र लढणार असल्याचे स्पष्ट केले आहे. पिंपरी-चिंचवडमध्ये सध्या भाजपविरोधात मोट बांधण्याचे प्रयत्न सुरू असून काँग्रेस आणि मनसेने अजित पवारांच्या राष्ट्रवादीलाही सोबत येण्याचे निमंत्रण दिले आहे.