Vidhaansabha Protest | राम मंदिर दानपेटी प्रकरणावर विरोधकांचा हल्लाबोल; वोट चोर, चंदा चोरच्या घोषणांनी सरकारला घेरलं

अयोध्येतील राम मंदिराच्या दानपेटी प्रकरणावरून राज्याच्या पावसाळी अधिवेशनात विरोधकांनी सरकारविरोधात आक्रमक भूमिका घेतली आहे. विधानभवनाच्या पायऱ्यांवर विरोधी पक्षातील आमदारांनी जोरदार घोषणाबाजी करत सरकारला या प्रकरणावर स्पष्टीकरण देण्याची मागणी केली.

विधानसभा आणि विधान परिषद या दोन्ही सभागृहांतील विरोधी पक्षाचे आमदार एकत्र येत सरकारविरोधात आंदोलन करताना दिसले. यावेळी “वोट चोर, चंदा चोर” अशा घोषणांसह सरकारवर टीकेची झोड उठवण्यात आली. तसेच राम मंदिरातील दानपेटी प्रकरणाची निष्पक्ष चौकशी करून दोषींवर कठोर कारवाई करण्याची मागणीही करण्यात आली.

आंदोलनादरम्यान विरोधकांनी “रामभक्तांची एकच मागणी, देणगी चोरांना फाशी” तसेच “मंदिर रामभक्तांनी बांधलं, पण दानपेटी लुटली” अशा घोषणा देत सरकारला लक्ष्य केले. या घोषणांमुळे विधानभवन परिसरात काही काळ तणावाचे वातावरण निर्माण झाले.

राम मंदिरातील दानपेटी चोरीच्या मुद्द्यावरून विरोधकांनी सरकारला थेट घेरण्याचा प्रयत्न केला असून या प्रकरणावर सरकारकडून काय भूमिका मांडली जाते, याकडे राजकीय वर्तुळाचे लक्ष लागले आहे. पावसाळी अधिवेशनात हा मुद्दा आणखी गाजण्याची शक्यता व्यक्त केली जात आहे.