Pune Municipal Election : आघाडीसाठी दादा आग्रही, मोठ्या पवारांचा विरोध? अजित पवारांचा ‘तो’ प्रस्ताव फेटाळला.

पुणे महापालिका निवडणुकीसाठी उपमुख्यमंत्री अजित पवार हे शरद पवारांच्या राष्ट्रवादी काँग्रेस पक्षासोबत आघाडी करण्यास आग्रही असल्याचे समोर आले आहे. प्रशांत जगताप यांनी शरद पवारांना लिहिलेल्या एका पत्रातून या माहितीला दुजोरा मिळाला आहे. या पत्रानुसार, अजित पवारांनी अंकुश काकडे यांच्यामार्फत पुण्यात दोन्ही राष्ट्रवादींनी एकत्र लढावे अशी अपेक्षा व्यक्त केली होती. मात्र, खुद्द शरद पवारांनी ही आघाडी होणार नसल्याचे स्पष्ट केले आहे.

तसेच, शरद पवारांच्या गटातील अनेक कार्यकर्ते अजित पवारांसोबत आघाडी करण्यास तीव्र विरोध करत आहेत. राष्ट्रवादीमध्ये फूट पडल्यानंतर कार्यकर्त्यांनी शरद पवारांवरील श्रद्धेमुळे पक्षाचा झेंडा खाली पडू दिला नाही. अशा परिस्थितीत, दोन्ही गट एकत्र लढल्यास पक्षाची स्थिती दयनीय होऊ शकते, असे प्रशांत जगताप यांनी पत्रात नमूद केले आहे. दोन्ही राष्ट्रवादी एकत्र लढण्याबाबत कार्यकर्त्यांमध्ये कोणतीही चर्चा नाही आणि भविष्यातही नसेल असे त्यांचे स्पष्ट मत आहे.