Sanjay Raut : पैशांसाठी गुंडांची रिघ.. उमेदवारीसाठी दादांकडे 5 तर शिंदेंकडे 10 कोटी घेतात, राऊतांच्या आरोपानं खळबळ

शिवसेना (उद्धव बाळासाहेब ठाकरे) नेते संजय राऊत यांनी सत्ताधारी पक्षांवर गंभीर आरोप केले आहेत. त्यांच्या मते, उमेदवारीसाठी पैशांची रीघ लागली आहे. राऊत यांनी म्हटले आहे की, अजित पवार गट उमेदवारीसाठी ५ कोटी रुपये घेत आहे, तर एकनाथ शिंदे गट १० कोटी रुपये घेत आहे. त्यांनी बाहेरून आलेल्यांना आणि गुंडांना उमेदवारी देण्याचे काम सर्व पक्षांनी केल्याचा आरोप केला. गजा मारणेच्या बायकोलाही उमेदवारी दिल्याचे राऊत यांनी सांगितले. राऊत यांच्या म्हणण्यानुसार, आजच्या राजकारणात कोणीही निष्ठावंत राहिलेले नाही. निष्ठावंतांची भूमिका पाहिली तर निष्ठा पैशांच्या पावसात वाहून गेल्याचे दिसते.

पुण्यामध्ये भाजपचे अनेक निष्ठावंत अजित पवारांच्या पक्षात आणि अन्य पक्षांत गेले आहेत, तर संभाजीनगरमध्येही निष्ठावंत म्हणून घेणारे भाजपचे शिस्तबद्ध कार्यकर्ते इतर पक्षांमध्ये सामील झाले आहेत. संजय राऊत यांनी भारतीय जनता पक्ष, शिंदे गट आणि अजित पवार गट उमेदवारी अर्जासोबत ५ ते १० कोटी रुपयांचे आर्थिक पॅकेज देत असल्याचा दावा केला. या गोंधळ आणि उमेदवारांच्या रीघेचे कारण हेच आर्थिक पॅकेज असल्याचे त्यांनी म्हटले आहे.