Sanjay Raut on Jarnage Viral Audio Clip : 500 कोटींची ऑडिओ टेप भाजपच्या आमदारानं फोडली संजय राऊतांचा गंभीर आरोप; महाराष्ट्राच्या राजकारणात खळबळ

महाराष्ट्राच्या राजकारणात सध्या व्हायरल झालेल्या एका ऑडिओ क्लिपने खळबळ उडवून दिली आहे. या क्लिपमध्ये मनोज जरांगे-पाटील यांच्याशी संबंधित ५०० कोटी रुपयांच्या कथित व्यवहाराची चर्चा असल्याचा दावा केला जात आहे. या प्रकरणावरून शिवसेना (उद्धव बाळासाहेब ठाकरे) नेते संजय राऊत यांनी भारतीय जनता पक्षावर गंभीर आरोप केले आहेत.

राऊत यांच्या मते, ही ऑडिओ टेप भाजपनेच फोडली आहे. एका भाजपच्या विधान परिषदेच्या आमदाराने ही टेप व्हायरल केली असल्याचा दावा त्यांनी केला. महाराष्ट्रातील सत्ताधारी पक्षांमध्ये सुरू असलेल्या अंतर्गत गटबाजी आणि स्पर्धा यामुळे ही कृती घडल्याचे राऊत म्हणाले. “केंद्रातील सरकार पडणार असल्याची खात्री आता सगळ्यांना होतेय, तेव्हा महाराष्ट्रामध्ये काय होणार, आपण कोणत्या गटातटात आहोत हे दाखवण्याची स्पर्धा सुरू झाली आहे,” असे राऊत यांनी म्हटले.

या प्रकरणात मनोज जरांगे-पाटील हे मुख्य पात्र असून, देवेंद्र फडणवीस आणि एकनाथ शिंदे हे दुय्यम कलाकार असल्याचा टोला त्यांनी लगावला. राऊत यांनी ५०० कोटींच्या कथित व्यवहाराच्या चौकशीची मागणी केली असून, मुंडवा जमीन घोटाळ्याचा संदर्भ देत तातडीने एफआयआर दाखल करण्याची मागणी केली. सरकारने एसआयटी स्थापन करण्यापूर्वी गुन्हा दाखल करावा आणि नंतर चौकशी करावी, असे राऊत यांनी स्पष्ट केले.