संजय राऊत यांच्याकडून माफी, भुसेंकडून खटला मागे; खापर आता हिरेंवर!

शिवसेना (उद्धव बाळासाहेब ठाकरे) खासदार संजय राऊत यांनी मंत्री दादा भुसे यांच्यावरील १७८ कोटी रुपयांच्या गिरणा सहकारी साखर कारखाना घोटाळ्याच्या आरोपांवरून त्यांची माफी मागितली आहे. या माफीनंतर दादा भुसे यांनी राऊतांविरुद्ध मालेगाव न्यायालयात दाखल केलेला मानहानीचा खटला मागे घेतला.

राऊतांनी मालेगावच्या अतिरिक्त न्यायदंडाधिकारी न्यायालयात भुसे आणि कारखान्याच्या सभासदांची दिलगिरी व्यक्त केली. माध्यमांशी बोलताना राऊतांनी सांगितले की, त्यांना ही माहिती चुकीच्या पद्धतीने मिळाली होती आणि त्यामागे भाजपमध्ये गेलेले अद्वय हिरे होते. हिरे यांनीच चुकीची माहिती पुरवली असल्याचा आरोप राऊतांनी केला. या घडामोडीमुळे महाराष्ट्राच्या राजकारणात नवे वळण आले आहे. दादा भुसे यांनी राऊत यांची माफी स्वीकारत मोठ्या मनाने खटला मागे घेतल्याचे सांगितले.