Sanjay Raut : तात्या विंचू चावा घेईल अन् रात्री येऊन गळा दाबेल… राऊतांची महेश कोठारेंवर मिश्कील टीका

संजय राऊत यांनी अभिनेता महेश कोठारे आणि उपमुख्यमंत्री एकनाथ शिंदे यांच्या राजकीय वक्तव्यांवरून जोरदार टीका केली आहे. महेश कोठारे यांनी दिवाळी पहाट कार्यक्रमात भाजपचा महापौर होईल, आपण मोदींचे भक्त असून भाजप आपले घर असल्याचे म्हटले होते. यावर प्रतिक्रिया देताना राऊत यांनी कोठारेंच्या मराठी असण्यावर शंका व्यक्त केली. कोण महेश कोठारे? मराठी आहेत ते? असे बोललात तर तात्या विंचू चावेल तुम्हाला रात्री येऊन गळा दाबेल, अशी उपरोधिक टिप्पणी त्यांनी केली.

एकनाथ शिंदे यांनी महायुतीचा अॅटम बॉम्ब लवकरच फुटेल आणि महाविकास आघाडीचे फटाके निष्प्रभ ठरतील, असे वक्तव्य केले होते. याला प्रत्युत्तर देताना राऊत यांनी निवडणुका पुढे ढकलण्याची विनंती कोणीही केली नसल्याचे सांगितले. उलट, निवडणूक याद्यांमधील घोटाळे दुरुस्त करण्याची मागणी केली. बाजीराव पेशव्यांचे उदाहरण देत राऊत म्हणाले की, पेशव्यांनी शौर्याने राज्य मिळवले, दिल्लीची चाटुगिरी करून नाही. एकनाथ शिंदे यांच्यासारखे पेशवे लाचार नव्हते, असेही त्यांनी नमूद केले.