बंडखोरीचा उद्रेक झालाय! संजय राऊतांची टीका

महाराष्ट्राच्या राजकारणात सध्या सुरू असलेल्या घडामोडींवर खासदार संजय राऊत यांनी तीव्र शब्दांत भाष्य केले आहे. सात वर्षांच्या प्रदीर्घ कालावधीनंतर होणाऱ्या निवडणुका सरळ मार्गाने होत नसल्याचा आरोप राऊत यांनी केला. धमक्या, दहशत आणि पैशाने माणसे विकत घेण्याचे प्रकार सर्रास सुरू असून, विकासकामांचे दावे करणाऱ्यांना या मार्गांचा अवलंब का करावा लागत आहे, असा प्रश्न त्यांनी उपस्थित केला.

मुंबईत 70 जणांना बिनविरोध निवडून आणणे, हे महाराष्ट्राच्या राजकारणातील नैतिक अधःपतनाचे लक्षण असल्याचे राऊत यांनी म्हटले आहे. अजित पवार भारतीय जनता पक्षासोबत युतीत असतानाही त्यांच्या भ्रष्टाचारावर हल्ला करत असल्याचा उल्लेख करत, ही एक नुरा कुस्ती असल्याचा दावा राऊत यांनी केला. विरोधकांना जागाच न ठेवण्याचा हा प्रयत्न असून, मराठी मतांचे विभाजन करण्यासाठी एकनाथ शिंदे गटाचा वापर केला जात असल्याचा आरोपही त्यांनी केला. या निवडणुकीत अभूतपूर्व बंडखोऱ्या, मारामाऱ्या आणि उमेदवारी अर्ज पळवण्याचे प्रकार घडले, जे वेळेत निवडणुका झाल्या असत्या तर दिसले नसते, असे राऊत यांनी नमूद केले.